23 мая 2015 г.
Мĕнрен пуçланнă
1965–2008 çулсенче Европăн команда кубокĕнче арçынсемпе хĕрарăмсен результачĕсене уйрăм шута илнĕ. 29 турнир ирттернĕ. Арçынсем хушшинче нимĕçсем 12 хут, СССР тата Раççей атлечĕсем – 7, Великобританин – 6, Францин – 3, Польшăн 1 хутчен çĕнтернĕ. СССР тата Раççей хĕрарăмĕсем 17 хут чемпионсем пулнă, нимĕçсем – 12. Раççей пикисем 1997–2008 çулсенче çĕнтерĕве алăран вĕçертмен.
Команда чемпионачĕ
Çăмăл атлетика енĕпе Европăн команда чемпионатне нумаях пулмасть ирттерме тытăннă. Шупашкарта вăл 6-мĕш хут иртет. Пĕрремĕшĕ Португалире пулнă, унта Раççей иккĕмĕш вырăн йышăннă. 2010-мĕшĕнче – Норвегире, 2011-мĕшĕнче – Швецире, 2013-мĕшĕнче – Великобританире (вĕсенче Раççей 1-мĕш пулнă), 2014-мĕшĕнче – Германире (Раççей – иккĕмĕш).
Лигăсем
Команда чемпионачĕ тăватă лигăран тăрать, унта пĕринчен теприне куçма май пур. Суперлига тата Пĕрремĕш лигăра 12 команда, Иккĕмĕшĕнче – 8, Виççĕмĕшĕнче – 14. Çулсерен Суперлигăран виçĕ команда тухса ÿкет, вĕсем вырăнне Пĕрремĕш лигăрисем куçаççĕ. Шупашкар суперлигăна йышăнать.
Кашни тĕсри çĕнтерÿçĕ 12 очко пухать, 2-мĕш вырăншăн – 11, виççĕмĕшĕшĕн – 10.
Программа
Кашни лигăра спортсменсем 20 тĕсре ăмăртаççĕ, вăл шутра – икĕ эстафета. Хĕрарăмсемпе арçынсен результачĕсене пĕрлештерсе пĕтĕмлетеççĕ.
Шупашкарти чемпионат
Çăмăл атлетика енĕпе Европăн команда чемпионачĕ Шупашкарта июнĕн 20–21-мĕшĕсенче иртет. Унта чи вăйлă 12 команда – Белоруссин, Германин, Великобританин, Испанин, Италин, Норвегин, Польшăн, Украинăн, Францин, Финляндин, Швецин тата Раççейĕн – тупăшĕç. Ăмăртусем «Олимпийский» стадионта пулĕç. Йĕтре ывăтакансене разминка ирттерме «Спартак» стадиона уйăрĕç.
Церемони
Чемпионат июнĕн 19-мĕшĕнче 20 сехетре Хĕрлĕ площадьре уçăлать. Чыслав июнĕн 21-мĕшĕнче «Олимпийский» стадионта пулать.
Кунтах 5 километра массăллă чупăва тухĕç. Ачасемпе çамрăксем валли спорт площадкисем йĕркелĕç. Ăмăртусене 200 ытла судья, вăл шутран 60-шĕ – Чăваш ен представителĕсем, хаклĕ. 350 волонтер хутшăнĕ.
Раççей команди
Пĕрлештернĕ команда йышне кĕртме спортсменсене май вĕçĕнче Сочире, çавăн пекех Мускав облаçĕнче Юлия Печенкина парнисемшĕн иртекен турнирта суйласа илĕç. Хĕллехи сезонри результатсене те шута хурĕç.
Раççейĕн тĕп соперникĕ – Германи.
Командăра шăчăпа сикессипе чăваш хĕрĕ Анжелика Сидорова та пулĕ. Ытти спортсменсен те шанăç пур.
Билетсем
Вĕсене Шупашкар тата Çĕнĕ Шупашкар кассисенче ирĕклĕн сутма пуçланă. Хакĕ 200-тен пуçласа 800 тенкĕ таран. Икĕ кунлăх билет пакечĕ – 300-тен пуçласа 1200 тенкĕ таран.