23 мая 2015 г.
Республика кунĕн мероприятийĕсем кăçал Шупашкарта тата Канаш районĕнче иртĕç.
Тĕп пулăмсем, паллах, – Чăваш енĕн тĕп хулинче: VIII Экономика форумĕ, Регионсем хушшинчи «Регионсем – чикĕсĕр пĕрлешсе ĕçлесси» XXII курав, Пĕтĕм тĕнчери фейерверксен VIII фестивалĕ, халăх пултарулăхĕн «Раççей çăлкуçĕсем» XXIII фестивалĕ, Пĕтĕм Раççейри декоративлă ĕçлев искусствин «Маçтăрсен Руçĕ» XIII конкурсĕ, Пĕтĕм чăвашсен Акатуйĕ.
Республика кунĕ йĕркипе тĕрлĕ объектсем хута кайĕç: Шупашкарта – Пăр керменĕ, Улатăр районĕнче – фельдшерпа акушер пункчĕ, Çĕнĕ Шупашкарта – клинкер брусчаткин тата облицовка кирпĕчĕн производстви. Çавăн пекех Чăваш енĕн тĕп уявĕ йĕркипе çамрăксен «СОК» фестивалĕ, çăмăл атлетика енĕпе Европăн команда чемпионачĕ, Пăрачкав районĕнче регионсем хушшинчи ирçе халăх пултарулăхĕн «Арта» фестивалĕ, Канаш районĕнче «Уй кунĕ – 2015» курав иртĕç. Кусем – мероприятисен вĕçленÿллĕ списокĕ мар.
Экономика форумĕ харăсах темиçе площадкăра ĕçлĕ. Фейерверксен фестивалĕнче пилĕк команда тупăшĕ. «Раççей çăлкуçĕсене» 50 ытла регион, çавăн пекех Беларуçри тата Словакири коллективсем хутшăнĕç. Чăвашсен Акатуйне 13 регионран килме заявка панă, вăл шутра Севастопольте пурăнакан чăвашсем те.