20 мая 2015 г.
Район администрацийĕн пуçлăхĕ Леонид Николаев ирттернĕ черетлĕ планеркăра иртнĕ эрнери ĕç-хĕле пĕтĕмлетнĕ хыççăн ача-пăча ÿнер шкулĕн директорне Татьяна Ильинана итлерĕç.
Хушма пĕлÿ учрежденийĕнче 261 ача вĕренет. Вĕсем тĕрлĕ конкурс-фестивальсенче çĕнтереççĕ пулин те ÿнер шкулĕн ыйтусем çук мар-ха. Чи çивĕччи – вĕренÿ пÿлĕмĕсем çителĕксĕрри. Кадрсене явăçтарассипе те йывăрлăхсем пур. 14 преподавательтен улттăшĕ – пенсире. Çамрăксем района таврăнасшăн мар. Шалу енчен лару-тăру япăхах мар пулин те.
Паянхи чи çивĕч ыйту, паллах, çурхи ĕçсем. Район администрацийĕн пуçлăхĕн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов çурхисене палăртнин 98 процентне (13490 га) акнине пĕлтерчĕ. 11 хуçалăхра çĕрулми лартаççĕ, хальлĕхе 362 га.
Хуçалăхсенче кĕрхисене – 4 пин ытла га – хурт-кăпшанкăсемпе çум курăкран хÿтĕлес мероприятисем пыраççĕ.
Ку эрнекун шкулсенче юлашки шăнкăравсем янăрĕç. Кăçал 11-мĕш класа 161 вĕренекен пĕтерет, 9-мĕш класа – 374-ăн.
Вĕрентÿпе çамрăксен политикин пайĕн пуçлăхĕн тивĕçĕсене пурнăçлакан Маргарита Тихонова «Ачалăх ячĕпе, ачалăхшăн» марафон вĕçленсе пынине аса илтерчĕ. Хальлĕхе 350 пин тенке яхăн пухăннă. Кăмăл тăвакансем ятарлă счет çине укçа куçарма ĕлкĕреççĕ-ха.
Иртнĕ эрнере çаратнă тĕслĕхсем пулнă. Кибер-мушенниксем хунанă. Республикăра суя укçа çаврăнăшра чылай. Асăрхаттару çинчен «Вурнарский» пайĕн пуçлăхĕ Андрей Губанов аса илтерчĕ.