20 мая 2015 г.
Химик кунĕ тĕлне «Август» Фирмăн филиалĕ Вăрнар çыннисем валли каллех парне хатĕрлет. Ытти çулсенче завод поселокра ача-пăча площадкисем çĕкленĕ пулсан кăçал кану вырăнĕ тата юмах хули йĕркелет.
Вăл фитнес-центр çумĕнче пулĕ. Халĕ кунта хăтлăх кĕртессипе пысăк ĕç пырать. Химиксем субботниксенче çĕре тикĕслеççĕ, газон курăкĕ акаççĕ, тротуар тăваççĕ. Завод техникине те хутшăнтараççĕ.
Кану вырăнĕ «Юмахсен уçланки» ятлă пулĕ. Фитнес-аэробикăна çÿрекенсем нумай çул ÿсекен чечексем лартнă.
Кунта чăннипех те илемлĕ. Хĕвеллĕ. Унран пытанма йывăçсем пулăшаççĕ. Кĕçех юнашарти пĕвере ишекен фонтан ĕçлесе кайĕ. Химик кунĕнче «Август» Фирмăн генеральнăй директорĕ Александр Усков каланă сăмахсем аса килеççĕ. «Вăрнара таса та хитре курас килет. Çакăн валли нумай укçа та кирлĕ мар, ĕçлес текен çынсем ытларах пулччăр. Пĕчĕккĕн Вăрнара сад-хулана çавăрăпăр», – тенĕччĕ вăл. Халĕ ку вырăнта пыракан ĕçсене кура ун сăмахĕсем чăннипех те пурнăçа кĕни куçкĕрет.
Л.ИВАНОВА.