20 мая 2015 г.
Асăрханă тăрăх, çуллен çапла: çурхи-çуллахи тапхăрта ирĕке хуçа хуралĕсĕр лартса хăварнă «велике» – велосипеда туххăм кам та пулин урăххи ларса тарать. Шÿтлекенĕ те пур та – анчах вăрлаканĕ ытларах. Çурт-йĕр тамбурĕсенчен, подъездсен умĕнчен, кантурсем патĕнчен çĕтни-çухални час-часах тĕл пулать. Кун пекки пĕлтĕр виçĕ хутчен çырăнчĕ. Преступниксенчен пĕрне тупрăмăр, лектертĕмĕр, тепĕр икĕ вăрă пирки шырав-тĕпчев малалла пырать. Полицие эсир те пулăшма пултаратăр. Пĕрне, сенкер рамăллă «Камелот» текен маркăллине, Тăвальушкăнь Ялтăра ялĕнчен пĕлтĕрхи майăн 24-мĕшĕпе 25-мĕшĕ тĕлĕнче ларса тухнă. Тепĕрне Вăрманкасра вăрланă, çул çитмен ачасен «великĕ» – рами сенкер тĕслĕ, марки «Стелс».
Кăçалхи тăватă уйăхра пирĕн республикăра велосипед вăрланă тĕслĕхсене 28 хутчен регистрациленĕ. Уголовлă пилĕк ĕçе татса панă, вăрăсене айăпланă.
Вăрă кăнтăрла та, каç та çивĕч куçлă – вăраха хуçасăр юлнă урапасене сăнама, тĕсеме пĕлет, хăш самантра ăçталла хăваласа тармаллине те палăртса хурать. Ачасем тĕллĕнех тимсĕртерех – ашшĕ-амăшĕ парнеленĕ «великĕсене» хăш-пĕрисем вĕр-çĕнĕллех çичĕ юта «тыттарса яраççĕ». Спортсменсен хаклă велосипечĕсене вăрласшăннисем нумай. Профилактика шучĕпе ăнлантару ĕçне-хĕлне туса пыратпăр-ха, анчах ачапча ашшĕ-амăшĕсен те, пысăккисен хăйсен те тимлĕрех пулмалла. Асăрхану мелĕсене шкулсенче те хăнăхмалла.
Велосипед вăрланипе сиксе тухакан преступленисен шутне чакарас тĕллевпе Шалти ĕçсен министерстви республика территоринче çак уйăхра «Велосипед» ятпа оперативлă профилактика мероприятийĕсем ирттерет. Вăрнарсене ку кампание активлă хутшăнма чĕнетпĕр.
А.СОРОКИН,
Шалти ĕçсен министерствин
Вăрнарти пайĕн пуçлăхĕн обществăлла йĕрке хуралĕ енĕпе ĕçлекен заместителĕ, полици подполковникĕ.