20 мая 2015 г.
Аслă Çĕнтерĕвĕн 70 çулхи юбилейне халалласа Кайри Тукай ялĕнче нумай енлĕ спорт вăййисем иртрĕç. Ăмăрту пуçламăшĕнче çамрăксене запасри офицер Николай Васильев, «Совет офицерĕсен союзĕ» обществăн Вăрнарти уйрăмĕн членĕ Борис Васильев, Çĕрпелти вăтам шкулти ĕç ветеранĕ Иван Николаев ăшшăн саламларĕç, ăнăçу, çирĕп сывлăх сунчĕç.
Спорт вăййисем пăшалтан тĕл перессипе уçăлчĕç. Çавăн пекех çамрăк спортсменсем хăвăрт чупассипе, граната ывăтассипе, çĕртен тытăнса çĕкленессипе ăмăртрĕç. Çак вăйăсенче Кайри Тукай ачисем тĕлĕнмелле çитĕнÿсем кăтартрĕç. Уйрăмах çамрăк каччăсене Павел Васильева, Николай Иванова, Максим Коршунова палăртмалла. Оля Васильевапа Анастасия Николаева маттур пулчĕç. Çĕнтерÿçĕсене грамотăсемпе дипломсемсĕр пуçне медальсем парса чысларĕç. Çак вăйăсем ял çыннисемшĕн чăн-чăн уяв: çамрăксемшĕн – хĕрÿ тупăшу тата кану, аслăраххисемшĕн çамрăклăха аса илни тата ытти те.
Ялти спорт уявĕсем çулленех Аслă Çĕнтерĕве халалланă палăк таврашĕнче – пĕрре февралĕн 23-мĕшĕ, тепре майăн 9-мĕшĕ ячĕпе иртеççĕ. Вĕсене ялĕпех пурте тухаççĕ. Палăка мрамортан хăпартса лартаканĕ (спонсорĕ) ОАО «Хÿтлĕх» гендиректорĕ Виталий Матвеев пулчĕ. Проекчĕ – Н.И.Васильевăн. Художникĕ – Праски Витти. Нимере ял ачисем ĕçленĕ.
В.МИХАЙЛОВ.