16 мая 2015 г.
Çанталăк аграрисене ĕçлеме чăрмантармасть, çавна май хăш-пĕр хуçалăхсем çурхи ĕçсене вĕçлесе те пыраççĕ
«Санары» агрофирмăра акă ыран-тепĕр кун çĕрулмие те лартса пĕтерĕç. Вăл пĕтĕмпе 100 га йышăнĕ. Кăçал санарпуçсем «иккĕмĕш çăкăрăн» сорчĕсене çĕнетессипе каллех сахал мар укçа тăкакланă. Германирен иртерех пулакан «Ред Соня», çавăн пекех «Гала», «Белароза» сортсене туяннă. Агрофирма директорĕ Роберт Петров ку çĕршывпа темиçе çул ĕçленине палăртрĕ, унтан кÿрсе килекен вăрлăхсем пысăк репродуктивлăхпа уйрăлса тăраççĕ.
Унсăр пуçне «Санары» уйĕсенче Санкт-Петербургран туяннă «Удача» суперэлита тата «Удача» элита сортсем те çитĕнĕç.
,нер Роберт Игнатьевичпа пĕрле хуçалăхăн уй-хирĕсенче пултăмăр. Пĕр ушкăн Кивьял Хапăс хыçĕнчи уйра вика акассипе тимлет. Культурăна çĕре тÿрремĕн хываççĕ. Сеялкăна вăрлăха манипуляторпа тиеççĕ. Çавăнпа та ĕçлекенсем те йышлăн кирлĕ мар. «Джон Дир» трактор рулĕ умĕнче опытлă механизатор – Олег Яковлев. Водительсем – Андрей Петровпа Вячеслав Назаров.
«Санары» ĕçченĕсем çавăн пекех культурăсене çум-курăкран, хурт-кăпшанкăсенчен хÿтĕлес мероприятисене пуçланă. Пĕрчĕллĕ культурăсене маларах хывнă ĕнтĕ, ĕнер вара ушах вырăнсене те акса пĕтернĕ.
Ял хуçалăх культурисем кунта пĕтĕмĕшле 1610 гектар йышăнаççĕ. Вăл шутран урпа – 254, çурхи тулă – 128, хуратул – 40, викăпа горчица хутăшĕ – 90, горчица – 30, сĕлĕ – 13, пăрçа – 55, нумай çул ÿсекен курăксем 181 га. Пĕлтĕртенпе санарпуçсем тимофеевка та акса тума пуçланă, кăçал ку культура 40 гектар çинче ÿсет.
Вăрлăхпа ĕçленĕ май, хуçалăх пысăк пахалăхлă сортсемпе пуянланассипе тухăçлă тимлет. Хамăр районти «Победа», «Луч» ял хуçалăх кооперативĕсем те «Санары» кăларакан сортсене час-часах туянаççĕ. Ытти районсем тахçанах кунти вăрлăха ытларах кăмăллаççĕ.
Виçĕмкун «Санары» уйĕсенче Китайран килсе çитнĕ делегаци те пулнă. Роберт Игнатьевич каланă тăрăх, вĕсем ытларах çĕрулми туса илес, хими препарачĕсемпе усă курас технологипе паллашнă.
С.ЧИКМЯКОВА.