16 мая 2015 г.
Офиссемпе лавккасене хÿтĕлес тĕллевпе
Тĕрлĕ учрежденисен офисĕсемпе лавккасем ют шутпа пуяс текен вăрăсене илĕртни никамшăн та вăрттăнлăх мар. Çавăнпа та вĕсен ертÿçи-хуçисене пурлăха хÿтлĕхре тытма хăш-пĕр сĕнÿсем паратпăр. Чи малтанах офиссемпе лавккасенче шанчăклă çăраллă алăксем ларттарма сĕнетпĕр. Чÿречесем çинче те металл решетке е урăхла хÿтĕлев хатĕрĕ пулмалла. Хуралпа пушар тата хăрушлăх сигнализацийĕ вырнаçтарма, вĕсене централизациленĕ хурал пульчĕпе çыхăнтарма май тупсан аван. Шалти ĕçсен пайĕ çумĕнчи ведомствăна пăхăнман хурал уйрăмĕпе килĕшÿ тусан сирĕн пурлăха хÿтĕлес тивĕçе полици хăй çине илет.
Пурлăхсăр юлас мар тесен
Хваттерсемпе уйрăм çуртсене çаратнă тĕслĕхсем те преступленисен йышĕнче чи анлă сарăлнисем. Вăрăсенчен шар курас мар тесен çак ансат правилăсене пăхăнма сĕнетпĕр:
– килтен тухса кайнă чух форточкăсемпе балконсене хупса хăвармалла;
– вăрăсем сейф çăрисемлĕ броньăллă металл алăксене те юратмаççĕ – вĕсене уçма нумай ăшталанма тивет;
– енчен те хăвăр е сирĕн ачасем уçăсене çухатнă-тăк, тÿрех çĕннисемпе улăштарăр;
– ăçта та пулин чылай вăхăтлăха каятăр пулсан, кÿршĕсене почта ещĕкне пăхса тăма хушăр – унта хаçат-çырусем пухăнса кайни вăрăсене кил хуçисем çуккине пĕлтерĕ;
– видеосăнав камерисем, домофон вырнаçтарни те пурлăха упраса хăварма пулăшĕ.
Анчах хваттере ведомствăна пăхăнман хурал уйрăмĕн пульчĕпе çыхăнтарса техника хурал хатĕрĕсем (хурал тата хăрушлăх сигнализацийĕсем) вырнаçтарни – пурлăха хÿтĕлемелли чи шанчăклă меслет. Çак мелпех, автотранспорт хăрушсăрлăхне тивĕçтерме, гаражсене те хурала илме май пур.
Пурлăх упранакан хăть мĕнле вырăна хÿтĕлеве илмелли тепĕр меслете те – автономлă сигнализацие – сĕнме пултаратпăр. Вăл ĕçлесе кайсан сигнал лампа е сирена çине кăна килет, иртен-çÿренсен тимлĕхне ÿстерет. Информацие сотовăй çыхăну урлă пĕлтерекен приборсемпе усă курма та пулать.
Пурлăха хÿтĕлессипе çыхăннă ыйтусем пулсан Вăрнарти ведомствăна пăхăнман хурал уйрăмĕнче хуравсем тупма пултаратăр. Пирĕн адрес: Вăрнар поселокĕ, Советски урамĕ, 23-мĕш çурт, тел. 2-74-92.
В.ПАВЛОВ,
Вăрнарти ведомствăна пăхăнман хурал уйрăмĕн пуçлăхĕ полици капитанĕ.