08 мая 2015 г.
Çĕнтерÿ юбилейĕ ячĕпе Шĕнер Ишекри шкулта иртнĕ мероприяти ачасен чунĕсенче патриотлăх туйăмне вăратнах.
Ăна йĕркелекенĕсем – ку шкултан вĕренсе тухнă, халĕ «Сельэнерго» тулли мар яваплă обществăн тĕп инженерĕ А.Васильев, Шĕнер Ишек ял поселенийĕн пуçлăхĕ В.Романов, А.Ефимов уйрăм предприниматель, Калинино райпо водителĕ В.Григорьев. Вĕсем хăй вăхăтĕнче пурте Германире службăра тăнă. Ачасем хăнасем служба вăхăчĕ, çар дисциплини çинчен каласа панине, çĕршыва хÿтĕлесси кашнин тивĕçĕ пулнине ăнлантарнине ăша хывнă. «Эпĕ астăватăп! Эпĕ мухтанатăп» конкурсра хастарлăх кăтартнă. Чи маттуррисем – Роман Давыдов тата Дмитрий Ефремов. Германире тăнă совет çарĕсен ушкăнĕн салтакĕсем çинчен калакан историлле материалсемпе халĕ кашни класрах кăсăкланса паллашĕç. Çитес тĕлпулу тата интереслĕрех пулма шантарать – ачасем августра ГСВГ гимнне пĕр саслăн шăрантарĕç.