06 мая 2015 г.
Эпир, Хураçырма ялĕнче пурăнакансем, çутçанталăка юратакансем, 5 çул каяллах ял вĕçĕнчи çырма пуçĕнче, шыв çулĕсем тапраннă вырăнта, çĕнĕрен вăрман çитĕнтерме шутларăмăр. Çамрăк хунавсем çулсерен çĕршер тĕп ÿстеретпĕр, çав лаптăка анлăлатсах пыратпăр. Шел, ял-йышра çакна хирĕç тăракансем те пур. Киревсĕр сăмахсемпе кÿрентерме пăхаççĕ. Чĕрĕ хунавсене хуçа-хуçа тăпăлтарса переççĕ. Çав вăхăтрах, акă, Николай Карпов пархатарлă çак ĕçе çулсерен активлă хутшăнать. Кăçал Геннадий Семенова 100 тĕп хунав лартса пулăшрĕ.
Ку енĕпе Ершепуç ял тăрăхĕн пуçлăхĕ Е.И.Музяков хытă тимлет. ,çе администраци ĕçченĕсене явăçтарать. Субботник кунне 4 пине яхăн йывăç лартрăмăр. Лаптăкĕ – 2 гектара яхăн. Пĕр михĕ юман йĕкелĕ акатпăр.
Культурăпа ял администрацийĕн ĕçченĕсем: Н.Захарова, Т.Савинова, А.Семенова, С.Комиссарова, Е.Музяков, И.Егорова, Г.Измакова, Л.Филиппова, Л.Гореева, С.Синатрова, И.Антонова активлă пулчĕç. Çĕнĕ вăрмана Аслă Çĕнтерÿ 70 çул тултарнă ятпа ÿстерес тетпĕр.
А.АЛЕКСЕЕВ,
пенсионер.