29 апреля 2015 г.
Район администрацийĕн пуçлăхĕ Леонид Николаев ирттернĕ черетлĕ планеркăра тĕп калаçуçă Вăрнарти хăйминчен уйăрнă типĕтнĕ сĕт завочĕн директорĕ Федор Волков пулчĕ.
Ăнсăртран мар. Иртнĕ çула завод лайăх кăтартусемпе вĕçленĕ, кăçалхи виçĕ уйăхра вара производство палăрмаллах чакнă. Директор çакна çынсем сĕт продукцине, тĕпрен илсен типĕ сĕте тата услам çăва, сахалрах туяннипе çыхăнтарчĕ. Халăх ытларах йÿçек сĕт продукцине кăмăллать, тупăш структуринче вăл 40 процентпа танлашать.
Юлашки вăхăтра предприятире пысăк реконструкци ĕçĕсем иртнĕ, çĕнĕ линисем хута янă. Продукци республика тулашне те ăсанать. Аталану планĕ пур – завод хăйĕн суту-илÿ точкисене ытти районсенче те уçасшăн.
Аслă Çĕнтерĕвĕн 70 çулхи юбилейĕччен шутлă кунсем юлчĕç. Леонид Николаев астăвăм вырăнĕсене йĕркене кĕртнипе пĕрлех вĕсем умĕнче хурал тăмаллине те аса илтерчĕ. Дежурство графикĕ хатĕр.
Вĕрентÿпе çамрăксен политикин пайĕн пуçлăхĕн тивĕçĕсене пурнăçлакан Маргарита Тихонова «Ачалăхшăн, ачалăх ячĕпе» ыркăмăллăх марафонĕ йĕркипе хальлĕхе 258 пин ытла тенкĕ пухăннине пĕлтерчĕ. Ку укçа нумай ачаллă, тупăш сахал илекен çемьесенчи ачасене вĕри апат çитерме кайĕ. Марафон малалла пырать – кашниех пулăшу алли тăсма пултарать.