29 апреля 2015 г.
Çĕрпелти вăтам шкулта пысăк та пĕлтерĕшлĕ уяв иртрĕ. 5-мĕш класри 21 вĕренекене кадетсен ретне йышăнчĕç. Вĕсен ушкăнĕ çак шкултан вĕренсе тухнă, Чечен вăрçине хутшăннă Владимир Антонов ячĕпе хисепленсе тăракан пулĕ.
Мероприятие хăнасемпе ĕçпе вăрçă ветеранĕсем те йышлăн пухăнчĕç. Вĕсен хушшинче çар комиссариачĕн Йĕпреç тата Вăрнар районĕсенчи пайĕн пуçлăхĕ В.Венедиктов, Çурçĕр Кавказри хирĕçтăрусене хутшăннă ветерансен союзĕн председателĕ А.Яковлев, районти «Пограничниксен çамрăк тусĕсен отрячĕ» штабĕн начальникĕ Ю.Никифоров, Раççейри «Боевое братство» организацийĕн вырăнти уйрăмĕн ертÿçи О.Никитин, запасри офицер Н.Васильев, матросăн ашшĕ А.Антонов, пиччĕшĕ С.Антонов тата ыттисем те. Вĕсем вĕренекенсене, вĕсен ашшĕ-амăшĕсене çак паллă пулăмпа саламларĕç, кадет ятне яланах çÿллĕ шайра тытса пыма сĕнчĕç.
Присягăра пиллĕкмĕш класри ачасем юратнă çĕршыва, тăван халăха сыхлама, вĕсене упрама, Тăван çĕршывшăн усăллă çын пулма тупа турĕç. Кадетсен ялавне тивĕçлĕн çĕклесе пыма шантарчĕç.
Уява Хапăсри вăтам шкулти çамрăк пограничниксем те хутшăнчĕç. Вĕсем хăйсен çĕнĕ тусĕсене юрă-ташăпа саламларĕç. Çĕрпелти вăтам шкулта вĕренекенсем те çамрăк кадетсене пĕчĕк концертпа савăнтарчĕç.
Н.ИГНАТЬЕВА.