29 апреля 2015 г.
Çак кун тĕлне Раççей Следстви комитечĕн Чăваш Республикинчи следстви управленийĕ производство травматизмĕн пĕлтĕрхи тата кăçал ку тапхăрчченхи кăтартăвĕсене пĕтĕмлетнĕ.
Пĕлтĕр ку категорипе 28 уголовлă ĕç пуçарнă (2013-мĕшĕнче – 2, 2012-мĕшĕнче – 24, 2011-мĕшĕнче – 12). Вăл шутран вилĕмле тĕслĕхлĕ производство инкекĕсем тĕлĕшпе 11 ĕç. Кăçал ку вăхăтчен 4 уголовлă ĕç çырăннă, иккĕшĕ техника хăрушсăрлăхĕн правилисене пăхăнманнине пула ĕç çыннисем вилнипе.
Уголовлă ĕçсене тишкернĕ май, ытти çулсенчи пекех, çынсем ытларах промышленность производствинче (2014 – 14 уголовлă ĕç, 2013 – 7, 2012 – 10, 2011 – 4) тата строительствăра (2014 – 10, 2013 – 15, 2012 – 9, 2011 – 4) суранланнă. Кунашкал фактсене ЖКХ тытăмĕнче тата ял хуçалăх сферинче те шута илнĕ.
Производство травматизмне тишкерес пулсан тĕп сăлтавсен шутне нумай чухне яваплă çынсем хăйсен ĕçченĕсем техника хăрушсăрлăхĕн правилисене пăхăнманнине е кирлĕ пек пăхăнманнине çирĕп тĕрĕслеменнине кĕртмелле. Çавăн пекех харпăр хăйне хÿтĕлемелли хатĕрсем çукки, юсавсăр, срокран тухнă оборудованипе усă курни, ĕç çыннисемпе инструктаж ирттерменни, ÿсĕр е наркотикпе усă курнă çынна ĕçе хутшăнма ирĕк пани, специальноçпе ĕçлеменни тата ытти те инкесен сăлтавĕ пулса тăраççĕ.
Пĕлтĕр çынсем техника хăрушсăрлăхĕн правилисене пăхăнманнине пула ĕç вырăнĕнче суранланнине тата пурнăçран уйрăлнине кура республикăри чылай предприяти пуçлăхĕ е яваплă çыннисем тĕлĕшпе уголовлă ĕç пуçарнă, явап тыттарнă.
Следстви управленийĕ тĕрĕслевĕн тата асăрхавăн ытти органĕсемпе пĕрле производство травматизмне пула шар куракансен прависемпе ирĕкĕсене хÿтĕлес, çавăн пекех следствин саккунлăхне тивĕçтерес тĕлĕшпе системăллă ĕç пурнăçлать.