25 апреля 2015 г.
Вырăнти хăйтытăмлăх органĕ – халăха чи çывăх влаç. Хăйсене хумхантаракан вăл е ку ыйтупа çынсем чи малтанах вырăнти администрацие килеççĕ. Вĕсен шанăçĕ, пĕрлешсе ĕçлени, влаçа пулăшса пыни – чылай пысăк ĕçĕн ăнăçăвĕ, аталанăвăн хăватлă инструменчĕ.
Çак шухăша ытларикун профессиллĕ уявра район администрацийĕн пуçлăхĕн заместителĕ – йĕркелÿ, кадрсен ĕçĕсен тата юридици службин пайĕн пуçлăхĕ Николай Петров уççăн палăртрĕ.
Халăхăн йĕркеллĕ, хăтлă, тивĕçлĕ пурнăçĕшĕн вырăнти влаçăн та яваплăхĕ пĕчĕк мар-çке. Ку пулăм, паллах, районăн социаллă пурнăçĕпе экономика аталанăвĕнчен нумай килет.
Пĕлтĕр акă район çыннисен пурнăç условийĕсене çĕклес тĕлĕшпе сахал мар ĕç тунă. Вăл шутра – фельдшерпа акушер пункчĕсем çĕклени те: Çарăклăра, Упнерте, Ишлĕре, ялсене шыв кĕртни те: Кульцав, çурт-йĕр хута яни, тĕрлĕ категорири çынсен пурăнмалли условийĕсене лайăхлатма патшалăх пулăшăвне уйăрни, тăлăхсене, çĕрĕшнĕ çуртра пурăнакансене хваттерсемпе тивĕçтерни тата ыт.те.
Çак ĕçсем, тĕпрен илсен, пĕтĕмпех муниципаллă служащисен хулпуççийĕ çине выртаççĕ. Вăрнар районĕнче вĕсем 118-ăн, вăл шутра 52-шĕ ял-хула поселенийĕсенче тимлеççĕ.
– Муниципаллă служащисен ĕçĕ çăмăл мар. Эпир, тĕрĕссипе, çÿллĕрех влаçпа халăх хушшинче. Çавăнпа та çÿлтен те, аялтан та ан вăрçчăр тесен пирĕн хамăрăн тÿрĕ тивĕçе чунпа пурнăçламалла, – терĕ район администрацийĕн пуçлăхĕ Леонид Николаев зала пухăннă вырăнти влаç представителĕсене.
Леонид Григорьевич хальхи вăхăтра, кăçал пурнăçламалли тĕп ĕçсем çинче чарăнса тăчĕ. Пĕрремĕшли, паллах, Аслă Çĕнтерĕвĕн 70 çулхи юбилейне чыслăн ирттересси.
Кăçалтан республикăра поселенисенчи ялсенчи урамсене вак чул сарса хăпартас программа ĕçлеме тытăннă. Вăрманкасра тата Енĕшре ун йĕркипе çул тăвас тĕлĕшпе аукционсем пуласса пĕлтернĕ ĕнтĕ.
Районта клубсем тăвас ыйту та çивĕч тăрать. Уравăшра, Шĕнер Ишекре, Пăртасра çук вĕсем. Леонид Николаев çавăн пекех ялсенче пурăнакансем хăйсем патĕнче фельдшерпа акушер пункчĕсем тутарасшăннине, вăрнарсем бассейн кĕтнине палăртрĕ.
Çавăн пекех вăл республикăра иртнĕ профессилле уявра вăрнарсене чысланине савăнса асăнчĕ. Кĕçĕн Кипек ял тăрăхĕн тĕп специалист-эксперчĕ Надежда Никишова «Чăваш Республикин вырăнти хăйтытăмлăх органĕсенче тÿрĕ кăмăлпа ĕçленĕшĕн» Мухтав паллине, Калинино ял тăрăхĕн пуçлăхĕн заместителĕ Алена Константинова Чăваш Республикин Патшалăх Канашĕн Хисеп грамотине тивĕçнĕ. Вăрман Кипек ял старости Галина Петрова – «Единая Россия» партин тавне.
Районти уявра та хисепе тивĕçнисем пулчĕç. Чăваш Патшалăх Канашĕн Хисеп грамотипе район администрацийĕн информатизаци пайĕн пуçлăхне Александр Ильина тата загс пайĕн тĕп специалистне Ирина Алексеевана чысларĕç. Район администрацийĕн грамотине, тавне чылаййăн тивĕçрĕç. Уйкас Кипек ял поселенийĕ вара муниципаллă пĕрлĕх канашĕн конкурсĕнче «Чи лайăх поселени» номинацире çĕнтернĕ.
Кăтартуллă ĕçлекен поселенисем районта чылай. Аçăмçырми ял тăрăхĕ акă пуçаруллă, пĕтĕçÿллĕ ĕçпе мухтанма пултарать. Ялсенче йăлари каяшсене Вăрнара турттарса тухассине йĕркеленĕ. Çÿп-çапа çынсем михĕсене пухаççĕ, транспортшăн хăйсемех тÿлеççĕ.
11 ялта халăхпа калаçса татăлса харпăр хăй килĕсем умне çынсем хăйсен шучĕпе энергие перекетлекен прожекторсем лартнă. Халĕ ялсенче çĕрĕпе 200 ытла точка çунать, апла пулин те перекетлĕхĕ икĕ хут ÿснĕ.
Анчах кунта та ыйтусем çук мар. Поселени пуçлăхĕ Олег Петров уявра тухса каланă май Аçăмçырми тăрăхĕнче те урамри çулсене юсассипе, пĕвесене тасатассипе, çуртсене харпăрлăха куçарассипе, çĕр лаптăкĕсене йĕркелессипе ĕçсем чылай тумаллине асăнчĕ.
Калаçусем, чыслав хыççăн районти культура çурчĕн артисчĕсем тата Кÿстÿмĕрти пултарулăх ушкăнĕ концертпа савăнтарчĕç.
С.ЧИКМЯКОВА.