25 апреля 2015 г.
Юнкун, Раççейри мĕнпур регионта тата 70 ытла çĕршывра старт илнĕ «Георгий ленточки» акцие Вăрнар районĕ те пĕрлешрĕ. Вунпĕрмĕш çул ĕнтĕ волонтерсем урамсене тухса пурне те Тăван çĕршывăн Аслă вăрçин символĕсене валеçеççĕ.
Çулăма тата тĕтĕме, миллионшар çын пурнăçĕн тата паттăрлăхĕн историне пĕрлештерекен лента кашниншĕн хаклă. Вăл ăрусен çыхăнăвне йĕркелет, çĕнтерÿçĕ-ăрăва хисеплеме вĕрентет. Кашнине Аслă Çĕнтерĕвĕн савăнăçĕпе пĕрлех вăрçăн хăрушă тапхăрĕсенчи, юнлă çапăçусенчи совет салтакĕсен паттăрлăхне, тылри халăхăн ĕçченлĕхне асилтерет. Ахальтен мар ĕнтĕ асăннă акци «Эпĕ астăватăп! Эпĕ мăнаçланатăп!» девизпа иртет.
Георгий ленточки – астăвăм, ăрусен çыхăнăвĕн тата çар мухтавĕн палли. Ăна акципе кашни çынна валеçсе пани паян тĕнчере Раççее хирĕçле историлле агресси пуçарнă вăхăтра уйрăмах пĕлтерĕшлĕ.
Вăрнар район çыннисем çакна ăнланни, ачисене пĕлтерме тăрăшни сисĕнет. Вăрнарти 1-мĕшпе 2-мĕш шкулсенчи, ял хуçалăх техникумĕнчи волонтерсен аллинчен илнĕ Çĕнтерÿ символĕсене кĕсьене, сумкăна пĕтĕрсе чикменни савăнтарчĕ. Георгий ленточкисем вăрçă паттăрĕсен ячĕпе нумайăшĕн кăкăрĕ, сумка çакки, автомашина антенни çинче ялкăшма тытăнчĕç...
С.ЧИКМЯКОВА.