25 апреля 2015 г.
«Мураты» ял хуçалăх предприятийĕ çĕр улми туса илессине çĕнĕ технологипе йĕркелесе янăранпа çирĕм çул çитрĕ. Лартассине, çитĕнтерессине, кăларассине, типĕ çанталăкра шăварассине, кăларнă çĕр улмие упрама сортласа хранилищĕне хурассине йăлтах механизациленĕ. Çĕр улми туса илме çирĕм тĕрлĕ техникăпа усă кураççĕ.
Ÿсĕм механизаторсен яваплăхĕнчен килет. Вĕсенчен вĕренмелли нумай. Вăрлăхсене çĕнетсе тăрассине, крахмалпа белок ытларах упракан сортсене суйласа илессине, çумкурăкпа хурт-кăпшанкăна пĕтерме имçамлассине, рет хушшисене кăпкалатассине, минераллă удобренисене вăхăтра хывассине тĕп вырăна хураççĕ. Тухăçлă çĕр улми туса илессипе ырă ят çĕнсе илнĕ çынсем хуçалăхра сахал мар. Михаил Владимиров, Владислав Волков, Илья Петров механизаторсем чăн-чăн ăстасем.
Çĕнĕ технологие ĕçе кĕртнĕ çĕрте хуçалăх ертÿçин çумĕн Юрий Петрович Спиридоновăн тÿпи пысăк. Çăкаллă Явăш тăрăхĕнче çитĕнтернĕ çĕр улми çĕршывăн хăш кĕтессине çитмен-ши;
В.МОСКВИН.