25 апреля 2015 г.
Пĕтĕм Раççейри ял хуçалăх çыравĕ 2016 çулхи июлĕн 1-мĕшĕнчен пуçласа августăн 15-мĕшĕччен пулать. Вăл çĕр ресурсĕсем, вĕсемпе эффективлă усă курасси, ял хуçалăх культурисен тата нумай çул ÿсекен курăксен лаптăкĕсем, выльăх-чĕрлĕх тата кайăк-кĕшĕк шучĕ, ĕç ресурсĕсем, ял хуçалăх продукцине сутни çинчен кирлĕ информацие илме май парĕ.
Çавăн пекех çырав вăхăтĕнче юлашки вунă çулхи ял хуçалăх технологийĕсен улшăнăвне те шута илĕç. Çакăн валли программăна производство инфраструктурин тата усă куракан технологисен характеристикин пункчĕсене кĕртнĕ.
Патшалăх пулăшăвĕн мерисен кирлĕлĕхне тата ку отрасль аталанăвне епле витĕм кÿнине палăртса çырав хучĕсенче кредитсем явăçтарни, субсидисем (дотацисем) илни çинчен ыйтусем пулĕç.
Чăвашстатран пĕлтернĕ тăрăх, халĕ республикăра çырава хатĕрленсе ирттерес ĕçсем пыраççĕ. Нормативлă право базине, списоксем йĕркелеççĕ, перепись объекчĕсен информацине тĕрĕслеççĕ.