22 апреля 2015 г.
Калининăри вăтам шкулти 8-мĕш кадет класĕ Пĕтĕм Раççейри смотрпа строй конкурсĕнче пĕрремĕш вырăн йышăннă!
Ку шкулăн кадетсен иккĕмĕш ăрăвĕ аслăрах юлташĕсен 2012 çулхи çĕнтерĕвне тепĕр хут пурнăçларĕ. 32 команда хушшинче чи чаплă результатсем кăтартрĕ.
Виçĕмкун калининăсем, малтанхи çĕр кăна çĕршывăн тĕп хулинчен таврăннăскерсем, кунĕпех салам сăмахĕсене йышăнчĕç. Мĕн тери пысăк çитĕнÿ вĕт! Чăваш ачисем, пирĕн ентешсем, каллех Раççейĕпе палăрма пултарчĕç.
Шкул директорĕ Татьяна Павловна Ефимова конкурс саманчĕсемпе паллаштарнине тав сăмахĕсенчен пуçлани ăнсăртран мар ĕнтĕ. Пулăшусăр ачасем Мускава те çитеетчĕç-ха. Район администрацийĕн пуçлăхне Леонид Николаева, хăйминчен уйăрнă типĕтнĕ сĕт завочĕн директорне Федор Волкова, Калинино райпо канашĕн председательне Венера Николаевана, «Туслăх» ентешлĕхĕн ертÿçине Андрей Васильева, «Снег» пĕрлешÿ ертÿçине Евгений Парши-на, «Вурнарыдорстрой» директорне Ольга Куликована, «Август» Фирмăн «ВХПЗ» филиалĕн директорне Владимир Свешникова, «Броневик» ял хуçалăх кооперативĕн ертÿçине Владислав Репина чĕререн тав турĕ Татьяна Павловна.
Валерий Краснов водителе ачасемпе çав тери тимлĕ пулнăран вĕсен ашшĕсемпе тан лартрĕ. Ачасен амăшĕсенче пысăк чунлăх пулни ун чĕрине хускатнă. Никита Ивановăн амăшĕ, Татьяна Ивановна, акă çул çине пылак шывсем, мăн хутаç вĕтĕ кукăльсем, Евгений Крыловăн амăшĕ, Альбина Ванифатьевна мăн курупкка канихвет хатĕрлесе панă...
Конкурс умĕнхи чун вĕчĕрхенĕвĕ, ун хыççăнхи хăпартланăвĕ вара пĕтĕмпех Мускавра пулнă. Ачасене вăрнарсен мухтавлă полковникĕ Эрик Васильев хăй ĕçлекен 1-мĕш кадет корпусĕнче кĕтсе илсе вырнаçтарнă. Калининăсем кунти кадетсен вĕренĕвĕн, пурăнмалли, канăвăн чаплă условийĕсемпе паллашса тĕлĕннĕ.
– Эрик Васильевичăн этемлĕхне, чунлăхне нимĕнпе те танлаштарма çук. Пирĕншĕн хыпса çуннишĕн çĕре çити пуçа таятăп – мĕн конкурс вĕçлениччен, эпир киле тухса киличчен ачасемпе юнашар пулчĕ вĕт, –– тĕлĕннине пытармасть Татьяна Павловна.
Конкурс иртекен пĕртăван Знаменскисен ячĕллĕ стадиона Калинино кадечĕсем ир-ирех, пĕрремĕш çитнĕ. Ыттисем киличчен виçĕ хутчен репетици ирттерни те пулăшнах вĕсене – тем пысăкăш стадиона тÿрех «çĕнме» çăмăл мар-çке.
Выступленисем пуçлансан вара пĕтĕм трибуна кĕрленĕ. Жюрире ларнă вице-адмирал Эрик Васильева калининăсен мăнаçлă утти хыççăн: «Хама çĕнĕрен çуралнăн туйрăм», – тесе пĕлтернĕ. Кадетсен наставникĕнчен Лев Ефимовран «ку ачасем хăш кадет корпусĕнчен» тесе ыйтнă, вĕсем ахаль шкултан çеç пулнине пĕлсен тĕлĕнмеллипех тĕлĕннĕ.
Истори ыйтăвĕсене хуравлассипе Мария Андреевапа Евгений Крылова кăна чи пысăк «5Ç» паллăпа хакланă.
Калашников автоматне сÿтсе пуçтарассипе класс иккĕмĕш вырăн йышăннă. Уйрăм зачетра вара Александр Иванов медале, грамотăна тивĕçнĕ.
Стройпа утас конкурс хăех темиçе тупăшăва пĕрлештернĕ. Кунта калининăсене пĕр сăмахсăр никам та çитеймен. Кашни пĕчĕк саманта шута хунă, çав тери тĕрĕс, пĕрле, пĕр пек яш та яш утакан урăх пулман. Çавăнпах-тăр вĕсене нумайччен тăвăллăн алă çупнă.
Бал ташши каламасăрах – пуринчен те чаплă!!!
Калинино кадечĕсене çакă та хавхалантарнă. Вĕсемшĕн Чăваш енрен тухнă, халĕ Мускавра пурăнакан офицерсем «чирленĕ». Ку шкултан вĕренсе тухнă Катăшри Михаил Григорьев генерал, Валерий Федоров адмирал та юнашарах пулнă.
Ачасем Эрик Васильевпа Хĕрлĕ площадьре, Астăвăм тăвĕнче пулнă, Истори музейĕнче Мускав, Курск пĕкки, Днепр çинчи çапăçусем, блокадăри Ленинград, Берлина илни çинчен диараммăсем пăхнă. Кунтах вĕсем Китайри çамрăксен ушкăнĕпе паллашса туслашнă. «Хурлану залĕнчи» 2 млн та 600 ярăмран ăсталанă куççуль тумламне пăхса тĕлĕннĕ, «Мухтав залĕнче» хамăр ентешсен – Совет Союзĕн Геройĕсен – ячĕсене тупса мăнаçланнă.
Çул çÿреврен асра юлмалли кунпа кăна вĕçленмен. Киле киличчен Михаил Григорьев шкула генерал тумне парнеленĕ. Виçĕмкунхи линейкăра вăл кăçал шкул пĕтерекен чи лайăх вĕренекен Алексей Воинов аллине символла куçнă.
– Район, республика чысне ямарăмăр. Мускаври офицерсене çĕре çити таймапуç. Ачасемшĕн çав тери пысăк ĕç тăваççĕ. Паллах, ку çĕнтерÿпе вĕçкĕнленсе, каппайланса каяс çук. Çакна ачасене кашнинчех тăнлантаратпăр. Ытти çĕнтерÿсем патне туртăнмалла, – пĕлтерет Татьяна Павловна.
Çакна та каламалла, Мускаври конкурса Мăн Явăш шкулĕн кадет класĕн командирĕ Татьяна Иванова та кайса курнă, хăйĕн Калининăри «ĕçтешĕнчен» – Катя Судоваран – вĕренмелли çав тери нумай пулнине палăртнă.
С.ЧИКМЯКОВА.