22 апреля 2015 г.
Чăваш ен Пуçлăхĕ Михаил Игнатьев ĕнер Чăваш Патшалăх Канашĕн сессийĕнче Министрсен Кабинечĕн ĕçĕ-хĕлĕ пирки отчет тунă май, республикăра юлашки виçĕ çулта демографи лару-тăрăвĕ лайăхланнине палăртнă.
Халăх йышĕ хăй хальлĕн ÿсесси 0,6 промиллепе танлашнă, 1 пин çын пуçне ача çуралассин коэффициенчĕ – 13,9. Ку Раççейри тата ПФО-ри вăтам кăтартуран пысăкрах. Чăваш енре пĕчĕк ачасем вилесси 1000 пепке пуçне 4,4-па танлашнă. Раççейре – 7,4, ПФО-ра – 7,2.
Пĕлтĕр 15 çĕнĕ ача сачĕ хута кайнă, шкул çулĕчченхи 5750 ача валли хушма вырăнсем тунă. Ку тĕллевпе 1 млрд тенкĕ уйăрнă. Кăçалхи çĕнĕ вĕренÿ çулĕ тĕлне икĕ çултан аслăрах мĕнпур ачана садиксене вырнаçтарма тĕллев тытнă.
Пĕлтĕр шкул ачисем Раççейри олимпиадăсенче çĕнтересси ÿснĕ. Çĕршыври топ-500 лайăх шкулсен йышне Чăваш енри ултă шкул кĕнĕ тата пилĕк шкул «200 чи лайăх ял шкулĕ» ята тивĕçнĕ. 30 пин ытла ача спортăн тĕрлĕ тĕсĕпе туслă.
– Демографин ырă тенденцийĕ республикăн экономикăри тата политикăри тăнăçлăхне, амăшлăхпа ачалăха тивĕçлĕ пулăшнине çирĕплетет. Çакăнпа ашшĕ-амăшĕ ыранхи куна шанать, – палăртнă Михаил Игнатьев.