22 апреля 2015 г.
Туçи Çармăс хĕрачи, Вăрнарти 1-мĕш шкулта вĕренекен Анита Маркова сумлă-чаплă лагерьте канма путевкăна шăпах çак мелпе çĕнсе илнĕ.
9-мĕш класс хĕрачи наци культурин «Туслăх хĕлхемĕ» республика фестивалĕнче чăваш чĕлхине, тăван ен культурине пуринчен лайăх пĕлнине кăтартса панă. Чăваш классикĕсен произведенийĕсен сыпăкĕсене тĕлĕнмелле хитре вуланă. Çапла вăл районти пекех республикăра та пĕрремĕш пулса тăнă.
Район тапхăрĕнче мала тухнă Туçи Çармăсри Анжела Филиппова тата Вăрнарти 2-мĕш шкулти Наташа Симбирева республикăра иккĕмĕш вырăнсене йышăннă.
Аслă Çĕнтерĕвĕн 70 çулхи юбилейне халалласа Шупашкарта халăх пултарулăхĕн фестивалĕ иртнĕ. «Савăн, Çĕнтерÿллĕ çуркунне!» конкурсра 33 ушкăн хушшинче Чăрăшкас Хирлепри культура çурчĕ çумĕнчи «Çĕнтерÿ» çар-патриотизм клубĕ виççĕмĕш вырăна тухнă.
Шкул ачисем хушшинче патриотла сăвăсен «Çĕр çинчи пурнăçшăн» республика конкурсĕнче те палăрнă вăрнарсем. «Çак куна эпир мĕнпур вăйран çывхартнă» номинацире Санарпуç шкулĕнчи Анжелика Иванова лауреат ятне тивĕçнĕ.
«Вăрçăра çуннă çулсем, кунсем...» номинацире Вăрнарти 2-мĕш шкулти Настя Ермошкина иккĕмĕш вырăн йышăннă.
Республикăри ачасемпе çамрăксен библиотеки ирттернĕ «Эпĕ – ĕçпе кăсăкланнă çын» элекронлă презентацисемпе видеороликсен конкурсĕнче Ярмушка шкулĕнчи Рома Сорокинăн видеороликĕ чи лайăххисен шутне кĕнĕ. Рома спортпа туслă, футболпа, ишессипе, çăмăл атлетикăпа, йĕлтĕр спорчĕпе кăсăкланать, обществăлла ĕçре хастар.
С.ЧИКМЯКОВА.