18 апреля 2015 г.
Куç курманнисен Пĕтĕм Раççейри обществине туса хунăранпа 90 çул çитет. Чăваш енрине йĕркеленĕренпе – 85 çул. ВОСăн пирвайхи съезчĕ Мускавра 1925 çулхи апрелĕн 6–11-мĕшсенче иртнĕ. Унта 25 кĕпĕрнерен 124 делегат хутшăннă, устав йышăннă, ĕç органĕсене суйланă. 1925 çулхи июлĕн 8-мĕшĕнче РСФСР Халăх Комиссарĕсен Канашĕ ВОС Положенине çирĕплетнĕ, куç курманнисен пурлăхпа культура ыйтăвĕсене тивĕçтермелли прависене палăртнă. Вăтăрмĕш çулсенче куç курманнисене активлă ĕçе явăçтарнă, вĕсем валли мастерскойсем, артельсем, предприятисем уçнă, професси шкулĕсем, курсĕсем йĕркеленĕ.
Обществăн Чăваш енри районсенчи уйрăмĕсем 1932 çулта йĕркеленнĕ. Вăрнарти пирĕн организаци инвалидсен прависене хÿтĕлессипе çавăнтанпах тимлĕ ĕçлет. 2010 çултанпа 1-мĕш ушкăнри инвалидсем санаторисенче вĕсене пулăшакансемпе пĕрле канма пултараççĕ. МСЭ комиссине Вăрнара чĕнсе илсе 43 инвалида 1-мĕш ушкăнрисен йышне кĕртнĕ. Кăмăл тунисене тифлоприборсемпе тивĕçтернĕ. Реабилитаци занятийĕсене яланах ирттеретпĕр. Çыхма вĕренекенсен кружокĕсем пĕрмаях ĕçлеççĕ. Реабилитаци йĕркипе Волоколамск центрне каякансем пулчĕç. Пĕлтĕр вунулттăн регионсем хушшинчи «Туслăх кăшăлĕ», «Эрудит», «Кĕр пики» конкурссене хутшăнма пултарчĕç. Яш-кĕрĕме «Тăван ялăн иртнĕ пурнăçĕпе пуласлăхĕ» форума явăçтартăмăр. Ачасем ÿкерчĕксен, «Талантсен фейерверкĕ» конкурссене кăмăллаççĕ. Районти библиотека сотрудникĕсем Т.А.Кольцова, Л.А.Романова пирĕн пĕлĕве, тавракурăма нумай енлĕн аталанма пулăшакан мероприятисем шухăшласа тупма ăста, тавах вĕсене çавăншăн. Пирĕн хушăра шашка-шахматла выляса ăмăртакансем нумай. Брайль шрифчĕпе кĕнеке вулама юратакансен йышĕ хушăнса пырать. Уçăлса çÿреме çуран та, йĕлтĕрпе те тухатпăр. Юлашки çулсенче инвалидсем пикенсех компьютер технологине алла илеççĕ.
Галина МЯСНИКОВА,
куç курманнисен районти уйрăмĕн председателĕ.