18 апреля 2015 г.
«Çĕнтерÿ çулне» вуламасан маншăн çăкăрсăр апат çинĕпе пĕрех. Ку – тахçантан пыракан йăла. Аллăмĕш çулсенчех, укçаран хĕсĕккине пăхмасăрах, район хаçатне çуллен илсе вулаттăмăр. Çарти хĕсметре çырăнтару вăйлă сарăлнăччĕ. Замполитсем сержантсене ирĕксĕрлесех хаçат çырăнтаратчĕç. Эпĕ хамăр республикăра тухакан «Коммунизм ялавĕ» хаçатпа «Капкăн» журнала илсе тăраттăм. «Капкăна» пурте юрататчĕç. /керчĕксене икĕ чĕлхепе ăнлантарнăран тĕрлĕ халăх салтакĕсем те вулатчĕç. Вăрçăра чăвашсемпе пĕрле çапăçнă рота командирĕ Иван Торбатовский майор пĕр номер те сиктерместчĕ. Эпĕ кăштах айăпа кĕрсен мана чăвашла вăрçма юрататчĕ. «Капкăн» штабра ĕçлекенсен аллинче те пулкалатчĕ. Каярахпа тăван ене таврăнсан пирĕн килтен «Çĕнтерÿ çулĕ» татăлман. Совет саманинче хаçат ялхуçалăхне ытларах сăнласа кăтартатчĕ, кашни номертех сводкăсемпе паллаштаратчĕ. Шăматкунхи номерсенче «Капкăн кĕтесĕ» вырăн тупатчĕ. Литература страницинче Хурăнсурти Калистрат Воробьев, Пăваялĕнчи Анатолий Алгашев, Чăрăш Мăратри Григорий Илепер, Мăн Явăшран Виктор Туринге пĕрмай пичетленетчĕç. Туçи Çармăс шкулĕнче пĕр вăхăтра вĕреннĕ Серфим Ефимовăн статйисене килĕштереттĕм. Хальхи почтальонсен сумкисенче ытларах хаçат-журнал вырăнне супăнь, шампунь, ытти тем те пĕр пур. ,ç укçи пĕчĕкрен чылай ялта почтальон тупăнмасть. Çав вăхăтрах пирĕн Туçи Çармăсри çыхăну уйрăмĕн ĕçченĕсем «Çĕнтерÿ çулне» нумайрах çырăнтарас енĕпе тăрăшни курăнать. Килсем тăрăх çÿресе ватăсене районти хыпарсене вуласа параççĕ. Э.Убакова почтальонка çаврăнăçулăхĕ ялти çынсене савăнтарать.
В.ПЕТРОВ.