15 апреля 2015 г.
Тунтикунсерен иртекен черетлĕ планеркăна хальхинче район администрацийĕн пуçлăхĕн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов ертсе пычĕ.
Ларура федераллă налук службин районсем хушшинчи 3-мĕш инспекцин ертÿçин заместительне Лариса Иванована итлерĕç. 1-мĕш кварталти ĕç-хĕле пĕтĕмлетнипе пĕрлех вăл парăмçăсем çинче те чарăнса тăчĕ. Çак уйăх пуçламăшĕ тĕлне бюджета 30,1 млн тенкĕлĕх налуксемпе тÿлевсем пырса кĕмен. Вырăнти налуксемпе тÿлевсен парăмĕ 1,1 млн тенкĕпе танлашать, вăл шутран çĕр налукĕ 461 пин тенкĕ, уйрăм çынсен пурлăх налукĕ 399 пин тенкĕ.
Аслă Çĕнтерĕвĕн 70 çулхи юбилейне хатĕрленсе ирттересси пирки социаллă аталану пайĕн пуçлăхĕ Сергей Гордеев каларĕ. Районти чылай палăкпа обелиск тĕплĕ юсав ыйтать. Вĕсене çĕнетме тата вĕсен территорийĕсене хăтлăх кĕртме район бюджетĕнчен 380480 тенкĕ пăхнă. Юсав ĕçĕсене май уйăхĕччен вĕçлемелле, палăртрĕç ларура.
Ветерансене юбилей медалĕсемпе чыслас мероприяти вĕçленсе пырать. Вĕсене пĕтĕмпе 819 çын тивĕçнĕ. 14 çынна кăна район тулашĕнче пурăннипе медальсене çакайман.
Çуркуннехи-çуллахи тапхăрта пушарсен шучĕ ÿсес хăрушлăх пысăк. Çавна май тимлĕхе ÿстермелли тата районти лару-тăру пирки ятарлă программăсен пайĕн пуçлăхĕ Федор Тимофеев паллаштарчĕ.
Ку эрнери тĕп пулăм – паян иртекен Пĕрлехи информаци кунĕ. Унта пĕлтерĕшлĕ ыйтусене пăхса тухĕç.