15 апреля 2015 г.
Шĕнер Ишекрен килсе çитнĕ Çĕнтерÿ Ялавне Калининăри вăтам шкулта «Çĕнтерÿ салтакне – мухтав!» девизпа кĕтсе илнĕ
Хисеп хуралĕ ун умĕнче тивĕçлĕ вырăн йышăниччен Ялав 1–4-мĕш классем йĕркеленĕ «Вилĕмсĕр полк» «витĕр» тухнă. Чаплă линейка хыççăн ăна кадетсем улшăна-улшăна чыслă йăтса тăнă.
Çак мероприятие вăрçă терт-нушине астивнĕ ветерансем килсе çитни çывхарса килекен уяв сĕмне палăрмаллах ÿстернĕ. Вĕсен аса илĕвĕсем – çĕршыв историйĕн, вăрçă тапхăрĕн страницисем. Заря Филипповна Тихонован класĕнче акă фашистсем сĕмсĕррĕн çĕршыв çине тапăннă çул çĕнĕ вĕренÿ çулне 60 ача пуçланă, 8-мĕш класа вара вуннăн çеç пĕтернĕ. Зоя Павловна Александрова, Мария Дмитриевна Афанасьева хăрушă тапхăрăн синкерне хăйсем çинче тÿснĕ. Аса илĕвĕсем учительсен, ачасен куçĕсене шывлантарнă.
Калининăри вăтам шкулта Аслă Çĕнтерĕвĕн 70 çулхи юбилейне хатĕрленсе чылай çĕнĕ ĕç пуçарнă. Ачасем пикенсех салтаксен сăмса тутрийĕсене тĕрленĕ. Ку мероприятире вĕсем 5-мĕш класра вĕренекен кашни ача аллинче пулнă. Аслăрах классем лартнă «Эх, дороги» сюита, «На поле танки грохотали» инсценировка, кадет класĕн плац-концерчĕ... пурне те тыткăнланă. «День Победы» юрра шкулĕпех юрлани пысăк пĕлтерĕшлĕ.
– Çĕнтерÿ Ялавĕн копийĕ умĕнче ачасене хисеплĕ хурал тăратни çав тери кирлĕ пулăм. Уйрăмах паянхи ăрушăн. Ку ĕçре ветерансемпе çыхăну татăлманни пĕлтерĕшлĕ. Ачасен вĕсем вĕрентсе каланисене асра тытасчĕ: вăйлă пулас тесен вĕренмелле, – палăртрĕ шкул директорĕ Татьяна Павловна Ефимова.
С.ЧИКМЯКОВА.