15 апреля 2015 г.
Ку сĕнĕве хаçата вулакансене, Вăрнар çыннисене анлăрах йышпа шухăшласа пăхмашкăн пĕлтерес килет. Вăл Валерий Пантелеймонович Ананьева юлашки çула ăсатнă кун çуралса çак çутă тĕнчерен уйрăлнăранпа хĕрĕх кунне асăннă сĕтел хушшинче аталанчĕ. Каласа хăварам-ха: унпа сывпуллашнă кунхине те, хыççăнхи пумилккинче те халăх йышлă пулчĕ. Асăрханă тăрăх, пурте пĕлнĕ-палланă ятлă-сумлă юлташăмăрпа уйрăлнă чухне ялан çавнашкал. Сăмах та çук: тăванĕсем, юлташĕсем ăна нихăçан та манмăпăр. Анчах халăх хисепĕн тÿпинче çăлтăрла çуталнă çынсене хамăршăн кăна мар, йăх-ăрусем сума сумалăх палăртасчĕ! Вăрнарта символлă çавнашкал ят кирлĕ: калăпăр, пĕр-пĕр çĕнĕ урама Ананьев ячĕпе чыслама юрать. Ун хисепнех, тен, преми, стипенди шутласа кăларакансем тупăнĕç – ку шухăш, эппин, малашнехи сăмах-юмах валли çăмхалантăр.
В.П.Ананьев вăрнарсемшĕн 43 çул канăçне уямасăр ĕçлерĕ. Чи аслăрах категорийĕпе республика анлăшĕнче пĕлнĕ хирург таран çĕкленчĕ. Сывлăх сыхлавĕн Совет Союзĕнчи отличникĕ. Хамăр республикăн, Раççей Федерацийĕн тава тивĕçлĕ врачĕ. Тăватă-пилĕк çул республика шайĕнчи халăх депутачĕ. Нумай çул – район депутачĕ. Тăватă çул хушши – сывлăх хуралĕн районти чи малти-çÿлти пуçлăхĕ. Виçĕмçул канăва тухичченех – хирурги уйрăмĕн ертÿçи.
Валерий Пантелеймоновичăн пархатарлă ĕçне-хĕлне хисеплĕн хакласа хаçатра эпĕ сахал мар çырнă. Пуринчен те ытла çынсем унăн тараватлă çынлăхне, професилле ăсталăхне юратнă. В.П.Ананьев телейлĕ пулчĕ: Вăрнара, район çыннисене тăванла кăмăлланă, харпăр хăй специальноçĕпе чаплăн маçтăрланса пынă пĕр тĕллевлĕ, туслă коллегăсен чăмăрĕнче ĕçлерĕ. В.П.Павлов, Д.Л.Филиппов, Н.И.Иванов, М.А.Николаев, Н.А.Курманина, В.Н.Кожанов, Ю.Л.Акилов, В.А.Краснов, П.К.Михайлов, М.М.Калачев, Р.Н.Прокопьева – кашниех вĕсем ĕмĕр астумалăх хисепе тивĕçлĕ.
«Оптимизаци» юхăмĕ пирĕн районти медучрежденисене те ура хурса мăкăлтарĕ. Анчах В.П.Ананьев, М.М.Калачев, ытти хăшпĕр юлташсем çак «оптимизацие» парăнасшăн пулмарĕç. Районти пуç больницăн хальхаççăнхи тĕп врачĕ Н.А.Тинюков врачсене, пĕтĕм персонала ĕçлемешкĕн лайăхрах условисем туса парасшăн, ĕç вырăнĕнчи хăтлăхшăн, коллективри пĕр кăмăллăхшăн, медиксен ăсталăхĕшĕн хытă тăрăшать – çынсем çакна тÿрех асăрханă. Шанчăк пур: В.П.Ананьев шайĕнчи тухтăрсем Вăрнарта малашне те пулĕç.
«Оптимизаци» калăпне хĕсĕнсе вырнаçайман çынсем тупăнса тăни шухăша хускатрĕ. Кемĕрти клиника главврачĕ Вадим Раскин анчахрах центрти пĕр хаçатра çырни тĕлĕнтерчĕ: «Тăванăмсем – врачсем, клиникăсен хуçисем! – тенĕ. – Тархаслатăп – атьăр-ха ветерансене пăхнăшăн вĕсенчен укçа ыйтмастпăр!..». Тухтăр патне фронтовик пырса тухнă-мĕн: «Пулăш-ха, ывăлăм, Çĕнтерÿ Парадне çитсе курас килет... Сывлăхăма кăштах хал хушасчĕ. Маншăн юлашки парад çывхарчĕ пулас...». «Сыватрăмăр çав асаттене, – тенĕ врач. – Кайрĕ вăл Парада. Ăна эмелленĕ хушăра ăнлантăм: эп ун аллинчен укçа йышăнас-тăк – юлашки сволочь пулса тăраттăм!».
В.Раскин (клиники хăйĕн – частникăн) Аслă вăрçă ветеранĕсене пилĕк çул хушши тÿлевсĕр сиплет. ,çтешĕсене шăпах çавăн пек тума чĕнет. Йыхравлă сăмахне правительствăна та çитересчĕ те çав!..
«Раççей хаçачĕ» (69 №) «Форбс» списокне кĕртнĕ миллионерпа паллаштарнă. Уралти олигарх Владислав Тетюхин Анат Тагилта хăй шучĕпе медицина комплексĕ туса лартнă. Унта 2277 операци тума ĕлкĕрнĕ. Интереслĕреххи акă мĕн. Пирĕн ытти олигархсем (чылайшĕ пĕр вăхăтрах темиçе патшалăх гражданинĕсем шутланаççĕ. Хăшпĕри пурнасса та Анăçрах пурăнать) миллиардлă долларсене ку енче пухса купаласан та леш енне – Анăçри банксемпе офшорсене хăвалаççĕ пулсан, Владислав Валентинович (вырăс вăл) хăйĕн кун-çулне-шăпине Раççейпе кăна çыхăнтарасшăн. Çĕршывăмăрти медицинăшăн хытах канăçсăрланать. В.Тетюхин «смута» вăхăтĕнче чубайссем путлантарнă предприятисене пĕрлештерсе тĕнчери чи хăватлă титан производствине йĕркеленĕ, тĕнче тăрăх хăй ирĕкĕпе çаврăнса медицинăри профильлĕ клиникăсемпе мĕнпурĕпе паллашнă, ун килĕнче медицинăн питĕ пуян библиотеки пухăннă. Хăрушă йывăр чирсенчен (онкологи, ытти) сыватакан Уралти Сывлăх комплексĕ Владислав Тетюхин ячĕпе хисепленĕ. Çав вăхăтрах вара пирĕн Вăрнарта Валерий Пантелеймонович Ананьев ячĕллĕ урам пултăр («Улица Доктора Ананьева»).
М.ВАСИЛЬЕВ,
литературăпа журналистика премийĕсен лауреачĕ.