15 апреля 2015 г.
Республикăра, районта пурăнакансем Космонавтика кунне уйрăм туйăмпа йышăнаççĕ. Пĕрремĕшĕнчен, çакă Чăваш çĕрĕ виçĕ космонавта – Андриян Николаева, Муса Манарова, Николай Бударина – çитĕнтернипе, иккĕмĕшĕнчен, Вăрнар тăрăхĕнче те космос çарĕнче службăра тăнă, космодромăн çĕр çинчи паллă объекчĕсене тума, ракета-космос техникине тĕрĕслес тата хатĕрлес ĕçе хутшăннă çынсем чылай пулнипе çыхăннă.
Кăçал акă Юрий Гагарин тĕнче уçлăхне тухнăранпа 54 çул, çĕршывра космонавтсен отрячĕсем çуралнăранпа 55 çул, Байконур космодромне йĕркеленĕренпе 60 çул çитрĕ.
Çак паллă датăсене халалласа Вăрнарти ял хуçалăх техникумĕнче савăнăçлă мероприяти иртнĕ. Унта Байконур космодромĕн ветеранĕсене, запасри офицерсене Александр Ильина тата Николай Васильева та чĕннĕ. Вĕсем çамрăксене паллă вĕçевсем мĕнле пурнăçланни, космос наукин уйрăмлăхĕсем çинчен каласа кăтартнă.
Космонавтикăпа çыхăннă ыйтусем те хĕрсемпе каччăсене ку енĕпе пĕлĕве тарăнлатма май панă. Мероприятин ăнăçăвĕ çакăнта – çамрăксем легендарлă ятсене, вĕсен вĕçевĕсем çинчен аван пĕлеççĕ.
С.ЧИКМЯКОВА.