11 апреля 2015 г.
Раççей Президенчĕн саламĕпе пĕрле вăрçă ветеранĕсем патне почтальонсем 25 пин ытла виç кĕтеслĕ çыру çитерĕç
Аслă Çĕнтерĕвĕн 70 çулхи юбилейĕ тĕлне Раççей Почти çак конвертсене ятарласа фронтри çырусен стилĕпе хатĕрленĕ. Ветерансем вĕсене алла тытсан тÿрех çамрăклăха, çарти тусĕсене, пăлхантаракан туйăмсене аса илĕç.
Май уйăхĕн пĕрремĕш кунĕсенче Чăваш енри почтальонсем 25224 виç кĕтеслĕ конверт валеçĕç. Ветерансем вĕсемпе Раççей тăрăх кирек хăçан та тÿлевсĕр çыру ăсатма пултарĕç.
Проекта «Ентешсен тавĕ – алă ăшши» акци йĕркипе шкул ачисене те хутшăнтарма палăртнă: виç кĕтеслĕ çырусене почта ĕçченĕсене вĕсем хатĕрлесе парĕç.
Раççей Почти çакнашкал пуçарупа пĕрре кăна палăрман. Виç кĕтеслĕ çырусене ветерансем патне Аслă Çĕнтерĕвĕн 60 тата 65 çулĕсенчи юбилейĕсенче те вĕçтернĕ.
Фронтри çырусене адресатсем патне тÿлевсĕр ярса панă. Виç кĕтеслĕ хуçлатнăскерсене çапла конверт та кирлĕ пулман. Вĕсене çыпăçтарман – çырусене пурпĕр цензура витĕр кăлармалла пулнă. Почта марки те çыпăçтарман, адреса листан тулаш енне çырнă.