08 апреля 2015 г.
«Çулталăк учителĕ-2015» конкурсăн районти тапхăрĕнче мала тухнă Ольга Физера халĕ ĕçтешĕсем те, пĕлĕшĕсем те чунтан çапла сунаççĕ
Вăрнарти 2-мĕш вăтам шкулта акăлчан чĕлхине вĕрентекен çамрăк учителĕн республика шайĕнче тупăшас опыт пур ĕнтĕ. Виçĕмçул вăл «Самый классный классный» конкурсăн иккĕмĕш призерĕ пулнăччĕ.
Пултаруллă класс ертÿçи, пуçаруллă, мал ĕмĕтлĕ педагогăн сумлăрах тупăшура та палăрма пĕтĕм шанăç пур. Çакна кулленхи ĕç тăрăх та калама пулать. Районти конкурсри уçă урок, педагогика канашĕ тăрăх та.
Мастер-класра Ольга Валерьяновна ачасене пĕрлештерсе ĕçлес технологипе паллаштарнă, педагогика канашĕнче вĕрентÿ ыйтăвĕсемпе хăйĕн çирĕп позицине палăртнă, уçă дискуссире хастар пулнă.
Паллах, ытти конкурсантсен те педагогикăри ăсталăхĕ пĕчĕк мар. «Çулталăк учителĕ - 2015» ята илессишĕн муниципаллă тапхăрта тăххăрăн тупăшнă: Вăрнарти 1-мĕш шкулти кĕçĕн классен учителĕ Светлана Добросмыслова, акăлчан чĕлхи учителĕ Екатерина Панькова, физкультура учителĕ Вячеслав Леонтьев, Хапăс шкулĕнчи чăваш чĕлхипе литература учителĕ Лариса Харитонова, Калининăри вăтам шкулти акăлчан чĕлхи учителĕ Людмила Чернова, Пăртас шкулĕнчи вырăс чĕлхипе литература учителĕ Наталия Никонова, Чăрăшкас Хирлеп шкулĕнчи биологи учителĕ Ираида Петрова тата Кĕçĕн Кипек шкулĕнчи историпе обществознани учителĕ Лариса Сидорова.
1-мĕш шкулти мастер-классем, педагогика канашĕ хыççăн конкурсантсен йышĕ сайралнă. Финалта пиллĕкĕн – Вячеслав Леонтьев, Ираида Петрова, Лариса Харитонова, Лариса Сидорова тата Ольга Физер – вăй виçнĕ.
Вăрнарти 2-мĕш вăтам шкул директорĕн вĕрентÿпе воспитани енĕпе ĕçлекен çумĕ Татьяна Сапожникова, республикăри 2013 çулхи çулталăк учителĕ, калаçу валли çивĕч темăсем сĕннĕ – вĕрентекенĕн этики, çамрăк кадрсене шкула явăçтарасси, педагогăн хăйĕн аталанса пырасси...
Жюри Ольга Валерьяновна Физерăн ĕçне, шухăшĕсене чи пысăк хак панă.
С.ЧИКМЯКОВА.