08 апреля 2015 г.
Уравăш шкулĕн спорт залĕнче «Курск» шывай атом крейсерĕ çинче çар тивĕçĕсене пурнăçланă чухне паттăррăн пуç хунă ентеше Виктор Юрьевич Сидюхина халалласа кăçал иккĕмĕш хут волейбол турнирĕ иртрĕ.
2000 çулхи августăн 10-мĕшĕнче «Курск» крейсер Кольски залива вĕренĕве тухнă. Тепĕр икĕ кунтан Баренц тинĕсĕнче путнă. Экипажра 108 çын пулнă, пĕрне те çăлма май килмен. Крейсер çинче пирĕн ентеш – манăн иккĕмĕш сыпăкри шăллăм Виктор Юрьевич Сидюхин та пулнă.
Виктор, Витя тесе чĕнеттĕмĕрччĕ ăна. Ашшĕ – Юрий Михайлович – Утар ялĕнчен, амăшĕ – Алевтина Михайловна – Красноармейски районĕнчи Чатукассинчен. 1970 çулта вĕсем Коми Республикине пурăнма куçса кайнă пулнă. Икĕ ывăл çитĕнтернĕ. Асли, Володя, 1972 çулта, Витя 1980 çулта çуралнă. Владимир çар тивĕçĕсене пурнăçланă хыççăн хăйĕн пурнăçне çарпа çыхăнтарнă, авланнă, 1999 çулта Александр ывăлĕ çуралнă.
Викторăн 1999 çулхи ноябрĕн 30-мĕшĕнче çара кайма ят тухнă. Мĕнле савăннăччĕ вăл хăйне «Курск» крейсер çине илнĕшĕн. Анчах шăпа урăхла килсе тухрĕ. 2001 çулта «Курска» шыв айĕнчен кăларнă. Ноябрĕн 2-мĕшĕнче Виктора хамăр ял масарĕнче пытартăмăр. 2006 çулхи ноябрьте çул çинчи аварире Сидюхинсен аслă ывăлĕн Владимирăн пурнăçĕ татăлнă.
Пысăк çухатусем Юрий Михайловичпа Алевтина Михайловнан сывлăхĕсене хавшатнă, çавăнпа вĕсем турнира килеймерĕç.
«Янгорчино» хуçалăхăн, «Август» фирмăн Вăрнарти хутăш препаратсен завочĕн, Вăрнар поселокĕн тата Уравăш тăрăхĕн волейболисчĕсем тупăшрĕç. Хĕрÿ ăмăртура иккĕмĕш çул çĕрпелсем пĕрремĕш вырăн йышăнчĕç, Виктор Сидюхин матрос ячĕллĕ куçса çÿрекен Кубока тивĕçрĕç. «Уравăш» команда иккĕмĕш, «Август» фирмăн Вăрнарти филиалĕн волейболисчĕсем виççĕмĕш пулчĕç.
Хирпуç ял тăрăхĕн пуçлăхĕ Валерий Терентьев турнира килнисене пурне те Хисеп грамотисемпе тата медальсемпе чысларĕ.
«Янгорчино» команда капитанĕ Михаил Горбунов паттăр матроса асра тытнăшăн, турнира ирттерме май тупнăшăн пуç тайса ăшă сăмахсем каларĕ. Матросăн ашшĕ-амăшĕ ятĕнчен Викторăн мучăшĕ – Утар ялĕнче пурăнакан Николай Михайлович Сидюхин – командăсене тата спонсорсене тав турĕ.
«Курск» крейсер путнăранпа кăçал 15 çул çитет. Паттăрсен ячĕсем яланах пирĕн асра пулĕç. Виктор Сидюхина чысласа çак турнира иккĕмĕш çул Хирпуç ял тăрăхĕн депутачĕ Александр Авакумов тăрăшнипе йĕркелетпĕр.
Александр Авакумов, Александр Федотов, Надежда Герасимова спонсорсене, турнира ирттерме пулăшнă Юрий Прокопьева, Людмила Косаревана, техĕмлĕ апатпа хăналанă Оксана Тимофеевана, Эльвира Васильевана, Зинаида Сидюхинана, Антонина Бородинана Сидюхинсен çемйинчен пысăк тав!
Е.ГОЛУБЦОВА.