01 апреля 2015 г.
Астăватăп: пирĕн хирурги уйрăмне пăшалтан персе амантнă çынна илсе пычĕç. Пыршăсенчи 103 шăтăка шыраса тупса сапларăмăр. Операци вăхăтĕнче ман коллега калать: «Урăх шырар та мар пулĕ, пурпĕрех вилет». «Эпир тухтăрсем, – терĕм, унашкал хăтланма юрамасть!» Вара хамăр ывăнса çитнине пăхмасăрах ĕçе татăклăн вĕçлерĕмĕр. Пиллĕкмĕш талăкра операци хыççăн ирхине пире те, арăмне те вилсен хăйне йĕркеллĕ пытарма ыйтать. Эпир ăна пĕрехмай сываласси çинчен шухăшлама сĕнетпĕр. Халĕ вăл 80 урлă каçнă ватă çын, хăйшĕн нушталлă йывăр пулнă самантсене маннă ĕнтĕ.
Эпир ĕçленĕ вăхăтра Сывлăх министрстви медицина пулăшăвне этеме тивĕçлĕ тăвассишĕн чунтанах тăрăшрĕ, сыватмалли корпуса районта та çĕнетрĕмĕр, çĕнĕ уйрăмсем уçăлчĕç, ĕç укçине пай тÿпе хывнă хака кура тÿлеме тытăнчĕç. Вăрнар тĕп больници кирек мĕнле вăхăтра та чирлисене çителĕклĕ пулăшу пама пултаратчĕ, йывăр чирлĕ çынна аякри уйрăмсене турттарса çÿресе вăхăтсăр вилме паман. Халĕ кирек мĕнле ыйтăва та больницăн тĕп врачĕсĕр татса пама май çук. Юрать-ха тĕп врачĕ халăх нушине ăнланма пĕлекенскер. Николай Тинюкова ырăпа кăна асăнмалла.
Тухтăра вĕренме кĕрекенсене ЕГЭ йĕркипе мар, пĕлÿ экзаменĕсене билет тăрăх тыттармалла тесе шутлатăп.
В.КОЖАНОВ.
Мăньял Хапăс.