28 марта 2015 г.
Çак ятпа район администрацийĕнче электронлă фотоальбомăн презентацийĕ иртрĕ
Альбома хатĕрлекенĕ – Чăваш Республикин электронлă тата кинодокументацин патшалăх архивĕ. Ун специалисчĕсем пирĕн районта иртнĕ çул пулнă, «Ăрусен астăвăмĕн эстафети» гражданла-патриотла акци йĕркипе халь пурăнакан вăрçă участникĕсен тата тыл ĕçченĕсен аса илĕвĕсене çырса, ÿкерсе илнĕ, çемье фотоальбомĕнчи сăнÿкерчĕксене компьютер çине куçарнă. Кусем, паллах, яланлăх архив управĕнче юлĕç.
Вăрнар тăрăхĕнчен электронлă фотоальбома 37 ветеран çинчен хаклă информаци кĕртнĕ. Чылайăшĕ вĕсенчен залра пулни уйрăмах паттăрлăх туйăмне, Çĕнтерÿ кунĕ çывхарса килнине ÿстерчĕ. Архив ĕçченĕсем Вероника Кочеткова тата Татьяна Гурьева каласа-кăтартса пынипе экранра Сергей Васильевич Барсуков, Михаил Степанович Ванюхин, Александра Алексеевна Зайцева, Иван Ильич Ильин, Александр Матвеевич Огурцов, Лев Антонович Павлов, Григорий Сергеевич Сергеев, Риза Низамович Усманов çинчен видеостраницăсем улшăна-улшăна пычĕç, вăрçăри, мирлĕ пурнăçри кун-çулĕ, наградисем, сăнÿкерчĕкĕсем.
Чăннипех те, пысăк ĕç. Çак фотоальбом паянхи ăрушăн, студентсемшĕн, тăван ен историйĕпе кăсăкланакансемшĕн хаклă пулĕ. Ветерансем ăна киле çитсен ачисемпе, мăнукĕсемпе тепĕр хут пăхрĕçех пулĕ – халăха социаллă хÿтлĕхпе тивĕçтерекен районти пай пуçлăхĕ Ирина Смолина, альбома хатĕрлеме хăй те сумлă тÿпе хывнăскер, асаилÿсен пуххине залри кашни ветеранах валеçсе пачĕ.
– Сире пирĕн телейлĕ пурнăçшăн тавах. Çĕнтерĕве эсир мĕн тери йывăр тиевпе, çамрăклăхпа туптанă, вăрçă хыççăн промышленноçа, ял хуçалăхне, ытти сферăна аталантарма пулăшнă. Пирĕн паянхи тĕллев – вăрçă участникĕсемпе тыл ĕçченĕсене пурне те тимлĕхпе уйăрасси, – терĕ район администрацийĕн пуçлăхĕн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов залра пухăннисем умĕнче пуçне тайса.
– Нихăçан та вăрçă нушине курас марччĕ. Тавах сире! – терĕ Вăрнар хула поселенийĕн пуçлăхĕ Анатолий Старовойт та.
Электронлă фотоальбомăн презентацийĕ йĕркипе виçĕмкун вĕсем сăваплă миссие пурнăçларĕç – ветерансен кăкăрĕсем çине «Тăван Çĕршывăн 1941 – 1945 çулсенчи Аслă вăрçинче Çĕнтерÿ тунăранпа 70 çул» медале çакса ячĕç. Наградăна тăххăрăн тивĕçрĕç, Сергей Барсуков, Григорий Сергеев, Федор Изулин, Василий Романов, Александр Селенин, Тамара Уразманова, Галина Холодова, Антонина Якимова.
«Была война, но вы пришли живыми... Фронтовики, наденьте ордена...», – патриотлăх туйăмне вăйлатса юрларĕç районти культура çурчĕн ĕçченĕсем.
С.ЧИКМЯКОВА.