28 марта 2015 г.
Кĕçĕн Кипекри Игорь Николаевич Сергеев фермер хуçалăхĕнче çуракине тĕплĕн хатĕрленсе çитнĕ. Урапаллă тракторсем виççĕшĕ те, «Нива» комбайн тата кăкарса ĕçлемелли агрегатсем паян тесен паян уй-хире тухма хатĕр. Мĕнпур йышши вăрлăхсем çителĕклĕ, йăлтах кондициллĕ. Çĕр пулăхне лайăхлатас тесе 15 тонна минераллă удобрени кÿрсе килнĕ, çунтармалли-сĕрмелли материалсене кирлĕ чухлĕ хатĕрленĕ.
Çĕрпе туллин усă курасси, унăн пуянлăхне типтерлĕ алла илесси – кăткăс та нумай енлĕ ĕç. Тăпра пулăхне лайăхлатса пырассине, вăрлăха çĕнетсе тăрассине, çĕре тулăх апатлантарассине, ăна эрозирен сыхлассине фермер хуçалăхĕнче тĕп вырăна хураççĕ. Çакă гектарсен тухăçне пĕр шайра тытса пыма май парать. Тăпра пахалăхне пуянлатса пымасăр тухăçлă тыр-пул çитĕнтерме, выльăх апачлĕх культурăсене çителĕклĕ туса илме май çук. Акă мĕншĕн хуçалăхра Александр Петров, Николай Данилов, Николай Гурьев механизаторсем ака-суха ĕçĕнче пултаруллисем шутланаççĕ. Çитес кунсенчех вĕсем кĕрхи тырăсемпе нумай çул ÿсекен курăксен лаптăкĕсене минераллă удобренисемпе апатлантарма тытăнĕç.
В.МОСКВИН.