28 марта 2015 г.
Вăрнар район прокуратури «Вурнары Завод СОМ» обществăра ĕç саккунĕсене пăхăннине тĕрĕсленĕ.
Палăртнă тăрăх, РФ Ёç кодексĕн 140-мĕш статйине пăсса (унпа килĕшÿллĕн ĕç килĕшĕвĕ вĕçленнĕ кун работнике ĕç укçине парса татмалла), С.Гаврилова ĕçрен хăтарнă кун укçа тÿлемен. Вăл предприятире пĕлтĕрхи декабрĕн 25-мĕшĕнчен тимлеме пăрахнă пулин те ĕç укçи тĕлĕшпе унпа кăçалхи январĕн 12-мĕшĕнче кăна татăлнă. РФ Ёç кодексĕн 80-мĕш статйине пăхăнмасăр, ĕç кĕнекине те декабрĕн 29-мĕшĕнче анчах алла тыттарнă.
Тĕрĕслев кăтартăвĕсем тăрăх обществăн тĕп бухгалтерĕ тĕлĕшпе административлă производство пуçарнă. Чăваш Республикинчи патшалăх ĕç инспекторĕн йышăнăвĕпе ăна 4000 тенкĕ штраф хунă.
Л.СПИРИДОНОВА,
Вăрнар район прокурорĕн помощникĕ
юстици кĕçĕн советникĕ.