25 марта 2015 г.
Вăрнарти хутăш препаратсен завочĕ кăçалхи юбилейлă çул ячĕпе поселок, район çыннисене чылай кăсăклă мероприятипе тĕлĕнтерĕ
Пуçламăшĕ пур ĕнтĕ. Нумаях пулмасть Вăрнар химикĕсем – управленире, цехсемпе подразделенисенче тимлекенсем – сцена çинчи пултарулăхĕпе савăнтарчĕç. Икĕ куна тăсăлнă конкурс чылай таланта тупса палăртрĕ.
Чи-чи маттуррисем эрнекун заводра пуçласа хатĕр продукци кăларнăранпа 85 çул çитнине халалласа ирттернĕ уяв программине илемлетме тивĕç пулчĕç. Зала пухнă ветерансен сăн-пичĕсенче концерт вĕçлениччен те çĕкленÿллĕ, хăпартлануллă туйăм сÿнмерĕ.
Петр Михайлов сăввипе хывнă завод гимнĕ пĕтĕм зал ура çинче тăнă май янăрарĕ. «Березка» ача сачĕн, 2-мĕш вăтам шкулăн воспитанникĕсен хĕмленÿллĕ номерĕсем тыткăнларĕç.
Завод управленийĕн ĕçченĕсем хăйсен инсценировкинче кĕтмен хăнасене – ял хуçалăх культурисен тăшманĕсене «тĕп турĕç», бухгалтери коллективĕ «Лайăх хĕрсен» тапхăрне тавăрчĕ, Елена Буданова рабочи профессине мухтарĕ, Ольга Илларионова, Вера Кольцова, Алексей Волков, ыттисем пăлхануллă ырă туйăмсем парнелерĕç. Тĕрĕссипе, концерт номерĕсем завод кун-çулĕн тĕрлĕ тапхăрне, халăхсен туслăхне, ĕçченлĕхпе профессионализма пĕрлештерчĕç.
Заводăн пысăк уявĕ çинчен ир-ирех ун территорийĕнчен поселок çийĕн сарăлнă юрă-кĕвĕ аса илтерчĕ. Ветерансене тăван предприятие автобус-машинăпа турттарса тăчĕç, цехсем тăрăх кăтартса çÿрерĕç.
Аслă ăрăвăн чунĕсенче экскурси уйрăмах мăнаçлăх туйăмĕ çуратрĕ. Территорире çĕкленсе ларнă корпуссем, халĕ пыракан пысăк строительство ĕçĕсем çине пăхса тĕлĕнчĕç вĕсем. Производство площадкисенче ветерансен асĕнче юлнă чĕркуççи таран дуст та, тусан та, пылчăк та çук ĕнтĕ. Пур çĕрте те чăн тасалăх хуçаланать.
Чăн та, иртнĕ юбилейрен кăна илес пулсан та завод аталану тĕлĕшпе сулмаклă утăмсем турĕ. Производство линийĕсем çулран çул çĕнелсе пыраççĕ, цехсенче алă вăйĕпе ĕçлессинчен хăтăлнă, автоматизациленĕ оборудовани чылай ĕçе çăмăллатнă.
– Улшăнусем тĕлĕнмелле пысăк. Ĕçле те ĕçле. Хамăр завода малалла та çĕкленме сунатпăр, – палăртрĕç ветерансем, кунта 30–40-шер çул тимленĕскерсем.
Тĕрĕссипе, уява пухăннă кашни ветеранăн ячĕ завод историйĕнче паха ĕçпе çырăнса юлнă. Вĕсен ĕçченлĕх пуçарăвне халĕ çамрăк ăру мăнаçлăн малалла тăсать.
Маччана çити чечеклесе хăпартнă «Август» символикинчи тĕссемлĕ хăмпăсемпе илемлетнĕ зала пухăннă 450 ытла ветеранăн кун-çулĕ – завод историйĕн хаклă страници. Шăпах вĕсем йывăр условисене пăхмасăр тăван предприяти ÿсĕмне, поселок аталанăвне сумлă тÿпе хывнă: заводăн тĕп корпусĕсем, Вăрнарти нумай хутлă чылай çурт, социаллă объектсем вĕсен аллипе çĕкленнĕ.
Владимир Свешников, «Август» Фирмăн «Вăрнарти хутăш препаратсен завочĕ» филиалĕн директорĕ, пухăннисене тăван заводăн 85 çулхи юбилейĕпе саламланă май, уйрăмах вĕсене ăшă сăмахсем парнелерĕ.
– 85 çул вăл – хăй пĕр самана. Завод сирĕнпе пĕрле аталанса пырать. Хальхи ăру сирĕнтен куçнă çĕнтерÿçĕ ялавне мăнаçлăн çĕклесе пырать. Предприяти темиçе çул ĕнтĕ отрасль лидерĕсенчен пĕри. Эсир вĕрентсе, çул кăтартса пынипе малашне те çапла пулĕ, – терĕ вăл ветерансене йывăр 90-мĕш çулсене тивĕçлипе чăтса ирттернĕшĕн, малашлăха шаннăшăн, кадрсене сыхласа хăварма пултарнăшăн тав туса.
«Август» Фирмăн генеральнăй директорĕн салам сăмахне зала пухăннисем тăвăллăн алă çупса йышăнчĕç. «Ун сывлăхĕшĕн чиркÿре çурта лартăпăр», – тесе калаçакана та илтме май пулчĕ. Мĕншĕн тав тумалăх пур ĕнтĕ ертÿлĕхе – пысăк чыс-хисепшĕн, яланхи пулăшушăн, хушма пенсишĕн...
Район администрацийĕн пуçлăхĕн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов ÿсентăрансене сыхлакан пахалăхлă препаратсем туса кăларассипе завод хими промышленноçĕнче малта пынине, вĕсене тĕрлĕ çĕршывра регистрацилессипе пысăк утăмсем тунине ырласа палăртрĕ.
Вăрнар хула поселенийĕн пуçлăхĕ Анатолий Старовойтăн ĕçĕ-хĕлĕн пĕр пайĕ заводпа çыхăннă. Çавăнпа та ĕçтешĕсене саламлама ăна уйрăмах кăмăллă пулчĕ.
Салам сăмахĕсем, концерт номерĕсем чыславпа черетленчĕç. Çак кун «Август» Фирмăн Вăрнарти филиалĕнче тăрăшакан чылай çын тĕрлĕ шайри грамотăсене тивĕçрĕ.
Кăçалхи тепĕр юбилейлă, пĕлтерĕшлĕ датăна та манăçа хăвармарĕç. Тăван çĕршывăн Аслă вăрçи завод историне те пысăк страница кĕртнĕ. Кунта тăрăшакан вун-вун çынна фронта илнĕ, вун-вун çын вара вăрçă нушине пула çуралнă вырăнсенчен тарса килсе Вăрнарта, хими заводĕнче, шăписене тупнă. Шăпах вăрçă вăхăтĕнче завод нумай нациллĕ коллектив пулса тăнă. Юбилей уявĕнче Михаил Ванюхинăн, Феодосия Журавлеван, Николай Константиновăн, Александр Огурцовăн, Анастасия Старовойтăн, Ризатдин Усмановăн кăкăрĕсем çинче Аслă Çĕнтерĕвĕн 70 çулхи юбилей медалĕсем ялкăшма тытăнчĕç. Сывлăхне пула завода çитеймен Иван Ефимовăн наградине мăшăрĕпе хĕрне тыттарчĕç.
Тĕрĕссипе, завод «çуралнă» уйăхри, мартри, юбилей уявĕ темиçе ăрăва пĕрлештерекен тĕлпулу пулчĕ. Концерт программине аякран артистсене чĕнсе йĕркелеменнин пĕлтерĕшĕ те пысăк – паянхи ĕçченсем те пуçаруллă ĕçлеме, аталану проекчĕсене пурнăçа кĕртме кăна мар, сцена çинче те пысăк ăстасем пулнине çирĕплетрĕç. Тивĕçлĕ канури ăру кашни номере хăйĕн чĕри витĕр кăларчĕ. Ăшă туйăмсем уяв вăхăтĕнче кăна хуçаланмарĕç, тулли кăмăл вĕсене малалла пурăнма та хавхалантарчĕ.
Уяв кунпа вĕçленмерĕ-ха, май уйăхĕнче заводăн 85 çулхи юбилейĕ тата та пуянрах программăпа тĕлĕнтерĕ.
С.ЧИКМЯКОВА.