25 марта 2015 г.
Утарçăсем – хурт-хăмăр ăстисем пуçтарăнчĕç. Йăлана кĕнĕ çулленхи семинар-канашлу унчченхинчен пысăкрах йышпа активлă иртрĕ. Докладпа хутшăннисем – пурте авторитетлă специалистсем.
Çав шутра: Чăваш Республикинчи акционерлă «Хурт-хăмăр агентстви» уçă обществăн генеральнăй директорĕ, ял хуçалăх наукисен кандидачĕ Геннадий Максимов, ял хуçалăх наукисен докторĕ Иван Мадебейкин профессор, Чăваш енри Госветслужбăн выльăхсен чирĕсемпе кĕрешекен Вăрнарти станцийĕн начальникĕ Геннадий Яковлев, райадминистрацин тĕп эксперт-специалисчĕ Георгий Романов, «Агро-Инновацин» Вăрнарти директорĕ Евгений Алексеев. Семинар ĕçне пуçăннă май райадминистраци пуçлăхĕн пĕрремĕш çумĕ – ял хуçалăхĕпе экологи пайĕн ертÿçи Вячеслав Горбунов агрокомплекс аталанăвĕн иртнĕ çулхи итогĕсемпе тата 2015 çулхи задачăсемпе паллаштарчĕ. Г.Яковлев вĕлле хурчĕсен ку чухнехи чирĕсем çинчен каласа кăтартнине, Г.Максимов ветеринари профилактикин çĕнĕ препарачĕсемпе паллаштарнине пурте тимлĕ тăнласа лартăмăр. И.Мадебейкин ытларах селекципе ăратлăх ĕçĕ-хĕлĕ çинче чарăнса тăчĕ, çут çанталăк ăшăнса пынă май шута илмелли ыйтусене хускатрĕ.
– Районти хурт-хăмăр ăстисем мĕнпур хуçалăхсенчен пĕлтĕр 40,1 тонна пыл уçласа илнĕ, – терĕ Георгий Павлович. – Кашни вĕлле пуçне 18,5 килограмм тивет. Çемьесен шучĕ 2,2 пине çитрĕ. Утарсем Ершепуç, Пăртас, Çĕрпел ял тăрăхĕсенче ытларах. Чи пысăкраххи ОАО «Санары» агрофирмăри шутланать (утарçи Василий Семенович Ильин). Хресчен-фермер хуçалăхĕн пуçлăхĕ Иван Михалович Федоров питĕ пуçаруллă, пултаруллă ĕçлет.
Семинарта пылпа ветеринари препарачĕсен выставкине йĕркеленĕ. Конкурс итогĕсем тăрăх Виталий Николаевич Николаев 1-мĕш вырăна тухрĕ тесе палăртрĕç (Кушик, Мăн Турхан ял тăрăхĕ), 2-мĕш вырăнта И.М.Федоров (Вăрнар), 3-мĕшĕнче – Николай Иванович Васильев (техникум преподавателĕ).
В.МИХАЙЛОВ.