25 марта 2015 г.
Раççейри Литература çулталăкне, Чăваш енри К.В.Иванов çулталăкне Раççей тата Чăваш писательсен союзĕн членĕ Улькка Элмен ăнăçупа пуçларĕ. Унăн «Упраймарăм сана» романĕн иккĕмĕш кĕнеки пичетленсе тухрĕ. Ăна та вулакансем кăмăлласа йышăнчĕç.
Чăваш наци библиотекинче çак кĕнеке презентацийĕ пулчĕ. Уява хамăр тата Тутарстан Республикисенчи чăваш чĕлхипе литературине вĕрентекенсем тата чăваш çыравçисем хутшăнчĕç.
Чăваш филологи наукисен кандидачĕ, литература тĕпчевçи, паллă ăсчах, çыравçă, вĕрентÿçĕ, таврапĕлÿçĕ Виталий Станьял иккĕмĕш кĕнекине кăранташа алран ямасăр, тимлĕ тишкерсе вуласа тухнине пĕлтерчĕ. Тĕрлĕ енлĕ шĕкĕлчерĕ романа. Хайлаври тĕп сăнара Машăна питĕ сăпайлă сăнланăшăн, пурнăçри пур йывăрлăхсене кÿренÿсĕр йышăннине сивлерĕ. Сăнара çирĕп характерлă тума май тупмалла тесе сĕнчĕ.
Раççей Федерацийĕн тава тивĕçлĕ ĕçченĕ, шкул программисемпе вĕренÿ кĕнекисем çыракан вĕрентÿçĕ Надежда Иванова йĕркеленипе чăваш чĕлхипе литературине вĕрентекенсем те ку хайлава хапăлласах тишкерчĕç.
Чăваш çыравçисем Юлия Силэм, Лидия Сарине ыр сăмахсем каларĕç. Эпир те Маргарита Соколовапа çак тĕлпулăва хутшăнтăмăр. Авшак Элмен хĕрĕ çакăн пек пултаруллă пулнăшăн мăнаçлантăмăр.
Л.ГРИГОРЬЕВА.