25 марта 2015 г.
Районти вĕрентÿ учрежденийĕсенче ачасене сывă пурнăç йĕркине хăнăхтарассине çÿллĕ шая лартнăран спорт секцийĕсен шутне те ÿстерчĕç. Вĕренекенсем халĕ спортăн анлă тĕсĕсене хăнăхаççĕ, вĕсемпе районти, республикăри ăмăртусене хутшăнаççĕ.
Баскетбол, ав, арçын ачасен кăна мар, хĕрачасен те юратнă вăййи пулса тăчĕ. Ку енĕпе иртнĕ район первенстви çакна тивĕçлипех çирĕплетсе пачĕ. Хĕрачасенчен чи çивĕччисем кÿстÿмĕрсем пулчĕç. Тренерĕ – Н.Ф.Афанасьев. Кĕмĕл призерсем – Кульцаври В.Н.Максимов вĕренекенĕсем. Виççĕмĕш вырăнта хапăссем, вĕсем Д.В.Герасимов патĕнче ăсталăха туптаççĕ.
Кÿстÿмĕр арçын ачисене ку тĕспе А.В.Политов туслаштарать, турнирта вĕсем виççĕмĕш пулчĕç. Кульцав каччисем иккĕмĕш, кусем те В.Н.Максимовăн вĕренекенĕсем. Чемпионĕсем вара Г.Г.Сорокинăн воспитанникĕсем – ярмушкасем.
Район çыннисем Вăрнарта бассейн пулассине чăтăмсăррăн кĕтеççĕ. Ку спорт сооруженийĕ ишев тĕсне те вăйлах аталантарма пулăшĕччĕ. Хальлĕхе спортсменсен тренировкăсене кÿршĕлле районсене çÿреме тивет.
Апла пулин те çамрăксем ку енĕпе ăмăртусенче палăрма пултараççĕ. Иртнĕ юнкун акă шкул ачисен спартакиади йĕркипе Чăваш ен Пуçлăхĕн Кубокĕшĕн иртнĕ тупăшура вăрнарсем пĕтĕмĕшле зачетра иккĕмĕш вырăн йышăннă. Командăра – Дмитрий Быков, Диана Политова, Марианна Орлянкова (Кÿстĕмĕр шкулĕ), Роман Сорокин (Ярмушка), Андрей Петров, Андрей Павлов (1-мĕш шкул), Кристина Скворцова (Аçăмçырми), Екатерина Судова (Калинино).
Ишев эстафетинче (4 х 50 м) бассейн çук районсем хушшинче хĕрачасем пĕрремĕш, арçын ачасем виççĕмĕш вырăн йышăннă.
Кире пуканĕ йăтакан çамрăк ăру районти паллă атлетсен – Анатолий Авруйский, Денис Тимофеев, Михаил Кузьмин, Алик Волков, Екатерина Козлова – тĕслĕхĕпе республикăри турнирсенче курăмлă çитĕнÿсем тăвать.
Етĕрнере иртнĕ Чăваш Республикин первенствинче акă Екатерина Лукинапа Александр Николаев ăнăçлă ăмăртрĕç.
Катя Вăрнарти 1-мĕш шкулта 10-мĕш класра çеç вĕренет-ха. Анчах спортра пысăк утăмсем тума ĕлкĕрчĕ. Ку турнирта вăл 63 килограмлă виçере иккĕмĕш пулнă. Сăмах май каласан, пултаруллă хĕрача нумаях пулмасть республикăри хĕллехи ял спорт вăййисенче доярсен конкурсĕнче район чысне çĕнтерÿллĕ хÿтĕленĕччĕ.
Саша – ку ăмăртăвăн бронза призерĕ – 24 килограмлă икĕ кире пуканне 47 хут тĕртсе хăйĕн рекордне лартнă. Вăл Тимĕрçкасси ялĕнчен. Халĕ Вăрнарти ял хуçалăх техникумĕнче вĕренет.
Шкул ачисен спартакиади йĕркипе республикăра волейбол лиги те пырать. Арçын ачасем хушшинче Вăрнар район чысне Малти Ишекри шкул команди хÿтĕлет. Иртнĕ эрнере Элĕкре иртнĕ зонăри ăмăртура вăл Хĕрлĕ Чутай, Элĕк, Етĕрне тата Çĕмĕрле район командисене çĕнтерсе черетлĕ тура тухнă.
Хĕрачасен командисем Хĕрлĕ Чутайра, Йĕпреçре тата Элĕкре тупăшнă. Пĕлтĕр вăрнарсем шкул лигинче пĕрремĕш пулнăран, кăçал унта виçĕ командăна хутшăнма ирĕк панă. Зонăсенче Вăрнарти 1-мĕш, Çĕрпелти тата Кÿстÿмĕрти шкулсен хĕрĕсем виççĕмĕш вырăнсене йышăннă. Виçĕ команди те тепĕр тура тухнă.
Çĕнĕ Шупашкарти çăмăл атлетика манежĕнче Пĕтĕм Раççейри чупу иртнĕ. Вăрнар районĕнчен унта пиллĕкĕн – Хăмăшри Кристина Иванова, Кÿстÿмĕрти, халĕ олимп резервисен училищинче вĕренекен Диана Политова, Аçăмçырминчи Настя Никифорова, Александр Александров тата Алексей Флегентов – хутшăннă. Пурте 800-шер метр чупнă.
Чупăвăн малтанхи тапхăрĕнче палăрса тăваттăшĕ финала тухнă. Дианăпа Кристина вара çĕнтерÿ пьедесталĕ çине тăма тивĕçнĕ: пĕрремĕшĕ – кĕмĕл, иккĕмĕшĕ бронза призерсем. Александра кăшт кăна ăнăçман, вăл виççĕмĕш вырăна темиçе çеккунтпа çеç выляса янă.
Çурхи хĕвел хытăрах та хытăрах пĕçертет пулин те йĕлтĕрçĕсем йĕлтĕрĕсене хывма васкамаççĕ-ха. Ветерансем хушшинче тĕнче чемпионкин Наталья Кузьминан парнисемшĕн иртнĕ йăлана кĕнĕ чупăва акă районти вĕренекенсем кăçал та хастар хутшăннă.
Наталья Кузьмина ытти çулхи пек ăмăртăва хăй çитеймен. Çак кунсенче кăна вăл Сыктывкарта иртнĕ тĕнче Кубокĕнче тупăшнă. 54-ри йĕлтĕр тусĕ малтанхи икĕ кунтах икĕ «ылтăн» çĕнсе илнĕ: 15 километрта ирĕклĕ стильпе ăмăртса тата 10 километрлă масс-стартра. Ăмăртусем шăматкун кăна вĕçленнĕ.
Районта вара пултаруллă спортсменкăн парнисене харпăр-хăй ÿсĕмĕнче Валентина Тикинева, Галина Тикинева, Данил Сергеев (ДЮСШ), Наталья Кузякова (Кульцав), Юрий Петров (Чăрăшкас Хирлеп), Максим Коршунов (Çĕрпел) çĕнсе илнĕ.
С.ЧИКМЯКОВА.