25 марта 2015 г.
Шкулсенче çуркуннехи каникул пуçланчĕ. Вĕренекенсемшĕн, паллах, хаваслă кану вăхăчĕ, анчах аслисемшĕн – тимлĕхе ÿстермелли тапхăр. Мĕншĕн тесен асăрхавсăр вăхăтра вĕсем ашкăннипе пушарсем алхасас е ытти инкек тухас хăрушлăх пысăкланать.
Пĕчĕккисен аслисене евĕрлес, пуринпе те кăсăкланас туртăм пур. Ашшĕ-амăшĕ çулăмпа усă курнине сăнаса вĕсем хăйсем те унпа интересленме тытăнаççĕ, унăн сиенĕ çинчен вуçех те шутламаççĕ. Çавăнпа та вĕсен аллине шăрпăк е зажигалка лекни уйрăмах хăрушă: пĕчĕк ачасем тĕрлĕ япаласене чĕртсе пăхни хăйсемшĕн те, ыттисемшĕн те синкерлĕ вĕçленме пултарать. Кунсăр пуçне электроприборсем çывăхне пыни, газ плити çинче апат пĕçерме е шыв вĕретме хăтланни те инкеке куçас хăрушлăх пур. Аслисене евĕрлесе ачасем вăрттăн сигарет туртма хăтланни те сайра мар. Кун пек чухне сÿнтермен чĕлĕм тĕпĕсем пушар сăлтавĕ пулаççĕ.
Вут-çулăмра ачасен пурнăçĕ татăлнин тĕп сăлтавĕ – инкекре çухалса кайни, хăйсене тĕрĕс тытма пĕлменни. Вĕсем инкекре вырăн е сĕтел айĕнче çăлăнăç шыраççĕ, хăвăртрах ăçта та пулин пытанма тăрăшаççĕ. Çавăнпа та хăть мĕнле ÿсĕмри ачасемпе пушар хăрушсăрлăх правилисем пирки калаçни, çулăм сиенне ăнлантарни пĕлтерĕшлĕ. Шăрпăк-зажигалкăсем те пĕчĕккисем çитмелле мар выртчăр, аслăраххисене вара килти приборсемпе асăрхануллă ĕçлеме вĕрентмелле. Ачасене çурт-хваттерсенче пĕччен питĕрсе хăварма юрамасть, инкек тухас-тăк вĕсем çунакан пÿлĕмрен хăйсем тĕллĕн тухаймĕç.
Çуркунне тепĕр хăрушлăх та çивĕч тухса тăрать – пăртан тасалакан пĕвесемпе юхан шывсем. Ашшĕ-амăшĕсене ачасене пăр кайнă вăхăтра шыв-шур хĕрне пыма юраманнине асăрхаттарма сĕнетпĕр.
И.МАКСИМОВА,
Вăрнарти 27-мĕш пушар чаçĕн инженерĕ.