20 марта 2015 г.
Чăваш ен Пуçлăхĕ Михаил Игнатьев журналистсемпе ирттернĕ черетлĕ пресс-конференцире калаçу пĕтĕмĕшле мĕнпур сферăна пырса тиврĕ. Икĕ сехет ытларах тăсăлнă тĕлпулура вăл массăллă информаци хатĕрĕсен 22 ыйтăвне туллин хуравларĕ.
Хăйĕн сăмахне Михаил Васильевич ырă пулăмран – Крым Раççее «таврăннăранпа» шăп та лăп çулталăк çитнинчен пуçларĕ. Ку республикăпа Чăваш ен ĕçлĕ çыхăнусем йĕркеленине палăртрĕ.
Пĕлтерĕшлĕ тепĕр хыпар – Тинĕс-çар флочĕн тĕп командующийĕн приказĕпе «Р-2» ракета катерĕ «Чувашия» ятпа çÿреме пуçланă.
Январь – февраль уйăхĕсенче промышленность производствин индексĕ танлаштаруллă тапхăртипе пăхсан 92,1 процент пулнă. Лару-тăру лайăх еннелле улшăнмалла, терĕ М.Игнатьев. Ырă тенденци вырăнне ĕç çыннисен вăтам шалăвĕн ÿсĕмне – 3,6 : – илсе кăтартрĕ: 19 пин те 682 тенкĕ.
Тавар хакĕсен индексĕ çинче те чарăнса тăчĕ, икĕ уйăхра вăл 106,5 процентпа танлашнă, çулталăкри прогноз – 115 процент. Анчах экономикăри лару-тăрăва пăхсан, ку цифра улшăнма та пултарать.
Республикăра пулса иртекен ырă пулăмсем, тĕрлĕ программăсем пурнăçа кĕни, субсидисем уйăрни федераллă центрпа çирĕп хутшăнусем йĕркеленинчен килнине каларĕ Михаил Игнатьев.
Массăллă информаци хатĕрĕсен представителĕсене республикăн экономика аталанăвĕ, политикăри лару-тăру, кризиса хирĕçле мерăсем йышăнни, социаллă программăсене сыхласа хăварасси, ял хуçалăхне пулăшасси тата ытти, тата ытти те кăсăклантарчĕ. Пĕр ыйту тепринпе çыхăнса пычĕ.
Яллă вырăнсенче пирвайхи медицина пулăшăвĕ парассинче Чăваш ен Пуçлăхĕн Указĕпе çĕкленекен фельдшерпа акушер пункчĕсем пысăк вырăн йышăнаççĕ. Анчах та Михаил Игнатьева медицина кадрĕсем çителĕксĕрри пăшăрхантарать. Ял больницисене специалистсене тавăрассипе «Земство тухтăрĕ» программа ĕçлет. Анчах та Чăваш ен Пуçлăхĕ отрасльти кадр дефицитне укçан кăна татса пама май килменнине палăртрĕ. Çамрăксене çуралнă вырăна тавăрас тесен вĕсене тăван çĕре, ун çыннисене юратма вĕрентсе ÿстермелле, терĕ вăл.
Культура çулталăкĕ вĕçленнĕрен журналистсене ку учрежденисен шăпи те кăсăклантарчĕ. Нумайăшĕ, чăн та, тĕплĕ юсав ыйтать. «ФАП-сем туса пĕтернĕ хыççăн эпир çĕнĕ программа йышăнатпăр. 50 клуб пулать-и е 75 – шухăшласа пăхăпăр. Яваплă йышăну кунта тăваймастăп, депутатсемпе канашламалла. Çитменнине, хальлĕхе укçа-тенкĕ çителĕксĕртерех», – терĕ кун пирки Михаил Игнатьев.
Кризисла лару-тăру вăхăтĕнче «Чăваш Республикин ĕç ветеранĕ» ята илмелли стаж планкине чакарни республикăна йывăрлăха кĕртсе ÿкермест-и? Республика Пуçлăхĕ лăплантарма васкарĕ – палăртнă суммăна ветерансем вăхăтра илсе тăрĕç. Çавăн пекех вăл экономикăри «вылявсене» пăхмасăр вăрçă участникĕсене, нумай ачаллă çемьесене, тăлăх ачасене çурт-йĕрпе тивĕçтерес программăсем йĕркеллех ĕçлессине пĕлтерчĕ.
Журналистсем çавăн пекех наци культурине сыхласа хăварасси, ытти регионсенче пурăнакан чăвашсем хушшинчи çыхăнăва çирĕплетесси, Аслă Çĕнтерĕвĕн 70 çулхи юбилейне кĕтсе илесси, республикăра ирттерме палăртнă çăмăл атлетика енĕпе командăпа ăмăртассипе Европа чемпионатне хатĕрленсе ирттересси пирки ыйтрĕç.
Сывă пурнăç йĕрки çинчен калаçнă май, республика Пуçлăхĕ çыннăн сывлăхĕ йăлтах хăйĕнчен килнине палăртрĕ. Михаил Игнатьев хăй – спортăн пысăк тусĕ. Футбол, волейбол вылять, йĕлтĕрпе, велосипедпа ярăнать, чупать. Нумаях пулмасть акă хоккей спортне алла илнĕ. Вăл пурне те спорт стильне тытса пыма чĕнсе каларĕ.
Çуракиччен вăхăт нумай юлмарĕ. Çавна май ку ыйту та çивĕч тăрать. Михаил Игнатьев кăçал ял хуçалăх таварĕсене туса илекенсене патшалăх енчен палăрмалла пулăшу парассине пĕлтерчĕ. Аграрисем çурхи уй-хир ĕçĕсене вăхăтра тата пахалăхлă ирттерме шантараççĕ.
Кăçал – суйлав çулĕ. Журналистсене, паллах, Михаил Игнатьев Чăваш ен Пуçлăхĕ пулма хăйĕн кандидатурине тăратасси кăсăклантарчĕ. «Манăн «Единая Россия» политика партийĕнчен праймериза хутшăнса хам кандидата тăратма ирĕк пур. Çак процедурăпа усă курса, суйлав саккунĕсене пăхăнса суйлава хутшăнатăп», – терĕ вăл халăх шанăçне туйнине палăртса...
С.ЧИКМЯКОВА.