20 марта 2015 г.
Юнкун Пĕрлехи информаци кунĕ йĕркипе районта пысăк ушкăн ĕçлерĕ. Ĕç тăвакан влаç тата вырăнти хăйтытăмлăх представителĕсем ĕç коллективĕсемпе, ял çыннисемпе тĕлпулчĕç.
Чăваш ен Юстици министрĕн заместителĕ Алексей Вязов район администрацийĕн пуçлăхĕпе Леонид Николаевпа Хапăса тата Пăртаса çитрĕç.
Хапăсри вăтам шкулта иртнĕ тĕлпулу ял çыннисемшĕн савăнăçлă самантпа асра юлчĕ. Хăнасем çĕнтерÿçĕ-ăрăва Аслă Çĕнтерĕвĕн юбилей медалĕпе чысларĕç. Вăрçă участникĕсенчен салара халĕ Иван Кондукторов кăна пурăнать. Çулĕсене пăхмасăр паттăр пахча ĕçĕпе хытах аппаланать, виноград ăнса çитĕнтерет. Награда ун кăкăрĕ çинче çеç мар, тылра тăрăшнă чылай ĕçченĕн кăкăрĕ çинче ялкăшма тытăнчĕ. Медале Упнер ял тăрăхĕнче 42 ветерана пама йышăннă. Мухтава тивĕçнисене çитĕнекен ăру концертпа савăнтарчĕ.
Хапăсри шкулта 120 ача пĕлÿ илет. Класĕсем çутă, таса. Иртнĕ çул «Единая Россия» парти проекчĕпе кунти спортзала та тĕпрен юсаса çĕнетнĕ.
Вăрнарта çеç мар, халĕ уйрăм ялсенче те кĕçĕннисене шкул çулĕчченхи вĕрентÿпе тивĕçтересси çивĕч тăрать. Хапăсра та садикре вырăн çитменнипе 20 ача валли шкулта кĕске кунлăх ушкăн йĕркеленĕ.
Оксана Жебелевская директор хăйсене аталанма Чăваш Патшалăх Канашĕн председателĕ Юрий Попов пулăшнине пĕлтерчĕ.
Çĕршывра «Пурне те çÿреме юрăхлă хутлăх» туса хурас тĕллевлĕ программăпа кăçал ку шкулта та инвалид ачасен (вĕсем тăваттă) вĕренÿ условийĕсене лайăхлатма 1 миллион та 700 пин тенкĕ уйăрнă. Вăрнарти 1-мĕшпе 2-мĕш шкулсенче кунашкал ĕçе пурнăçланă ĕнтĕ. Сăмах май, 2015-мĕшĕнче Калинино шкулне те ку программăна кĕртнĕ.
ЧР Юстици министрĕн заместителĕ Алексей Вязов, район администрацийĕн пуçлăхĕ Леонид Николаев пухăннисене республикăри, районти лару-тăрупа паллаштарчĕç.
Пăртасра та вĕсем социаллă пурнăçпа экономикăн тĕп саманчĕсем çинче чарăнса тăчĕç. Анчах ыйтусем те çук мар. Район тĕп больницине, ав, 20 врач çитмест. Çул-йĕр тума тата реконструкцилеме чылай укçа-тенкĕ кирлĕ. Умра – çураки. Ăна хатĕрленсе ирттерессине те пысăк тимлĕх уйăрмалла.
Пăртассен те ыйту çук мар. Ку ял çыннисене те садик çукки пăшăрхантарать, çавна май вĕсем ăна шкул çуртĕнче уçас ыйтăва çĕклерĕç.
Шкул директорне Виталий Уткина яла хăтлăх кĕртес ыйту тата шкул çывăхĕнчи çул юрăхсăр пулни пăшăрхантарчĕ.
Тĕпрен илсен, юлашки çулсенче Пăртас ял тăрăхĕн пуçлăхĕ Геннадий Петров ял хушшинчи çулсене юсассипе чăннипех пысăк ĕç пурнăçланине палăртмалла.
Алексей Вязовпа Леонид Николаев кунта та сăваплă миссие пурнăçларĕç – Çĕнтерĕве çывхартассишĕн ырми-канми тăрăшнă ветерансене «Тăван çĕршывăн 1941 – 1945 çулсенчи Аслă вăрçинче Çĕнтерÿ тунăранпа 70 çул» юбилей медалĕсем çакса ячĕç, мирлĕ пурнăçшăн тав турĕç. Сывлăхĕсем хавшанипе чыслава çитейменнисене ял администраци поселенийĕн тата культура ĕçченĕсем килĕрен çитсе саламларĕç.
Калининăра Роспотребнадзорăн Чăваш Республикинчи управленийĕн ертÿçин заместителĕ Вячеслав Егоров, район администрацийĕн социаллă аталану пайĕн пуçлăхĕ Сергей Гордеев, 27-мĕш пушар чаçĕн ертÿçи Владимир Афиногентов хутшăннипе Пĕрлехи информаци кунĕн темисене çеç мар, халăха хумхантаракан ытти ыйтусене те сÿтсе явнă.
Калинино ял тăрăхĕн пуçлăхĕ Людмила Иванова Аслă Çĕнтерĕвĕн 70 çулхи юбилейне хатĕрленсе ирттерес мероприятисем çинче чарăнса тăнă.
Çынсем салари предприяти-учрежденисенче шалăва картта çине куçарма тытăннăран укçа-тенкĕ алла илессипе чăрмавсем сиксе тухнăшăн пăшăрханнă. Кăçалхи январьтен Перекет банкĕн банкомачĕ юрăхсăра тухнă. Унăн салари уйрăмĕ 13 сехетчен кăна ĕçлет, çынсем вара ĕçрен 16 сехетре тухаççĕ...
Çуркунне çитнĕ май, территорие хăтлăх, тасалăх кĕртес ыйтăва та çивĕччĕн çĕкленĕ.
Çавалкасра информаци ушкăнĕ, ăна район администраци пуçлăхĕн пĕрремĕш заместителĕ – ял хуçалăхĕпе экологи пайĕн пуçлăхĕ Вячеслав Горбунов ертсе пынă, кăçал районта палăртнă çул-йĕр ĕçĕсем, Аслă Çĕнтерĕвĕн 70 çулхи юбилейне кĕтсе палăксемпе обелисксене йĕркене кĕртесси пирки калаçнă.
Мероприяти чыславпа вĕçленнĕ. Вячеслав Горбунов тата халăха социаллă хÿтлĕхпе тивĕçтерекен районти центр ертÿçи Ирина Смолина ветерансен кăкăрĕсем çине юбилей медалĕсем çакса янă.