20 марта 2015 г.
Вăрнарти Тăрăллă пăр катокĕ каллех спорт тусĕсене йышăнчĕ. Виçĕмкун кунта шкул ачисен спартакиади йĕркипе Чăваш ен Пуçлăхĕн Кубокĕшĕн пынă «Ылтăн шайба» клубăн республика ăмăртăвĕсен тата «Надежда» турнир çĕнтерÿçисене чысларĕç.
Пăр çине Йĕпреç, Муркаш, Патăрьел, Елчĕк, Çĕмĕрле районĕсен çамрăк хоккеисчĕсемпе вăрнарсен спорт сооруженийĕпе пĕр ятлă «Кристалл» команди те тухрĕ. Николай Старостин ертсе пыракан ачасем хăйсен ÿсĕмĕнче иккĕмĕш вырăн йышăнчĕç. Медальсене, Кубока тивĕçнисĕр пуçне командăна клюшкăсем туянма сертификат та пачĕç.
Пăр керменĕ темиçе сехет турнирти хĕрÿ самантсене пула янăраса тăнă хыççăн çĕнтерÿпе-вылявпа хĕмленнĕ çамрăксене чыславра сумлă çынсем саламларĕç. Чăваш Республикинчи федераллă тĕп инспектор Геннадий Федоров, физкультурăпа спорт министрĕ Сергей Мельников, вĕрентÿпе çамрăксен политикин министрĕн заместителĕ Надежда Дмитриева, район администрацийĕн пуçлăхĕ Леонид Николаев спортăн ку тĕсĕпе чăн-чăн арçынсем кăна туслашнине, вĕсем пĕчĕкренех хăюллă, патвар çитĕннине, çак ăмăртусем сумлăрах турнира çул уçнине палăртрĕç.
Тăрăллă пăр катокĕ ĕçлеме тытăннăранпа çулталăк та çитмен-ха, анчах çакнашкал çитĕнÿ туни – мĕн тери пысăк ÿсĕм. Эппин, вăрнарсен хоккей «тĕнчинче» тата та çĕнĕ ятсем уçас шанăç пысăк.
С.ЧИКМЯКОВА.