18 марта 2015 г.
Шăматкун республикăри ытти çĕрти пекех районта та Пĕрлехи сывлăх кунĕ иртрĕ. Сывă пурнăç йĕркине кăмăллакансене хальхинче те Тăрăллă пăр катокĕнче, физкультурăпа спорт комплексĕнче, «Химик» стадионта йышлă курма май килчĕ. Спорт сооруженийĕсем çак кун тÿлевсĕр ĕçлерĕç.
Район спортсменĕсем вара хăйсен вăйне тĕрлĕ ăмăртура тĕрĕсленĕ. Ирĕклĕ майпа кĕрешекенсем Чăваш ен чемпионачĕн медалĕсемшĕн тупăшнă. Упнер каччи, халĕ ача-пăча спорт шкулĕнче ку тĕспе тренерта тимлекен Юрий Степанов тата Санарпуçĕнчи Диана Яковлева çĕнтерÿ пьедесталĕн иккĕмĕш пусми çине хăпарма тивĕçнĕ.
Халĕ педуниверситетра пĕлÿ илекен Рома Львовăн, Пăваялĕнчи Сергей Кирилловăн, Вăрнарти Сергей Ивановăн тата Пăртасри Яна Лукинан – бронза медальсем.
Лапсар сали тăтăшах йĕлтĕрçĕсене пуçтарать. Хальхинче кунта марафон дистанцийĕсемпе пĕр вăхăтрах Пĕтĕм Раççейри чупу тата республика чемпионачĕ иртнĕ.
Раççей марафонĕнче Мăньял Хапăсри Владимир Тикинев 50 километра, Вăрнарти Александр Романов 30 километра виççĕмĕш результатпа вĕçленĕ. Чăваш ен чемпионатĕнче иккĕшĕ те кĕмĕл призерсем пулса тăнă.
Кунтах иртнĕ «Çурхи тумлам» чупура 1-мĕш шкулта вĕренекен Валентина Тикинева икĕ километрта 1-мĕш вырăн йышăннă.
Шăматкун «Единая Россия» партин регионти уйрăмĕ республикăра йĕлтĕр эстафети йĕркеленĕ. Районăн Владимир Яковлева, Владимир Политова тата Татьяна Федорована пĕрлештернĕ команди унта вунтăхăр командăран улттăмĕш пулнă.
Улатăрта вара кире пуканне йăтакансем республикăра мала тухассишĕн кĕрешнĕ. Ачасемпе çамрăксен Вăрнарти спорт шкулĕн тренер-преподавателĕ Анатолий Иванов патĕнче ăсталăха туптакан Екатерина Лукина (Вăрнар) унта 2-мĕш, Александр Николаев (Туçи Çармăс) 3-мĕш вырăнсене йышăннă.
С.ЧИКМЯКОВА.