14 марта 2015 г.
Иртнинче тата ку эрне пуçламăшĕнче районти çамрăк кĕрешÿçĕсем харăсах тимиçе турнир пьедесталне çĕннĕ.
Çĕнĕ Шупашкарта 1998 – 1999 çулсенче çуралнă хĕрсем хушшинче иртнĕ Атăл тăрăхĕн федераллă округĕн первенствинче Мăн Турхан тăрăхĕн хĕрĕсем Наташа Дмитриева – иккĕмĕш, Надя Краснова виççĕмĕш вырăнсене йышăннă.
1995 – 1997 çулсенче çуралнă кĕрешÿçĕсем те Тольяттире ку шайри турниртах тупăшнă. Пăваялĕнчи Настя Иванова ылтăн медаль çĕнсе илсе Раççей первенствине хутшăнма тивĕçнĕ. Виçĕ эрнелĕх сбора тухса кайнă ĕнтĕ вăл.
Шел те, ку ялти Сергей Кириллова тата Вăрнарти Роман Львова ку хутĕнче ăнăçман.
Çĕнĕ Шупашкарта тата Хĕрлĕ Чутай салинче йĕркеленĕ республикăн уçă турнирĕсенче кĕçĕнреххисем пысăк ăсталăх кăтартнă. Пĕрремĕшĕнче Мăн Явăшри Катя Кошкина чемпион пулса тăнă, Санарпуçĕнчи Настя Краснова бронза медаль çĕнсе илнĕ.
Иккĕмĕшĕнче çĕнтерÿçĕсем иккĕн: 1-мĕш шкулти Дима Шерстнев тата Санарпуçĕнчи Антон Федоров. 1-мĕш шкулта пĕлÿ илекен Никита Львовпа Дмитрий Львов иккĕшĕ те кĕмĕл призерсем. 2-мĕш шкулта Денис Федоров, Алексей Тимофеев тата Алексей Краснов виççĕмĕш вырăнсене йышăннă.
С.ЧИКМЯКОВА.