14 марта 2015 г.
Вăрнар – Элĕк çулĕпе çÿренĕ чух сулахайра, Малтикас енче, ял-хула евĕрлĕ комплекс ÿссе сарăлнине асăрхатăн. Юлашки çулсенче кунта Вăрнарти аш-какай комбиначĕн хушма хуçалăх предприятийĕ хăватлă аталанса пырать. Акционерлă уçă обществăн фермисенче çĕр çын ытла кунсерен ĕçлет. Çав шутра эпир чылайранпа лайăх пĕлекен юлташсем – Чăваш Республикин тава тивĕçлĕ агрономĕ Владимир Васильевич Антонов тата Чăваш Республикин ял хуçалăхĕн тава тивĕçлĕ ĕçченĕ Валентина Степановна Тимофеева.
Владимир Васильевичпа хамăрăн тăван Мăн Явăшра тĕл пулса сахал мар калаçнă. Çамрăк агроном практикăра та, институт хыççăн та талантлă организаторпа – Ульянов ячĕллĕ колхоз председателĕпе Михаил Петрович Петровпа пĕр тĕллевлĕн пултаруллă ĕçлерĕ, хăй калашле, аслă юлташĕнчен паха опыта пайтах вĕренчĕ, халь, авă, республика шайĕнче мухтава тухнă предприятире ÿссе-аталанса çĕнĕ çитĕнÿсемшĕн ăнтăлать. Валентина Степановна акционерсен «Вăрнарти аш-какай комбиначĕ» обществăра ĕçле пуçланăранпа 28 çул çитрĕ. Вăл кун-çулĕ тăршшĕпех хăйĕн специальноçне парăнса ăсталаннă, вĕреннĕ те ĕçленĕ, вĕреннĕ те ĕçленĕ. Ульяновск облаçĕнчи Дмитровградра сĕт технологийĕн техникумне, Шупашкарта Чăваш патшалăх университетне пĕтернĕ. Практикăсен вăхăтне хулари предприятисенче ирттернĕ. 1986 çулхи сентябрьтенпе Вăрнарта: аш-какай комбинатĕнче кăлпасси цехĕн мастерĕ, аслă мастерĕ, план пайĕн экономисчĕ. Юлашки 8 çул хушшинче 100 çынлă коллектив ертÿçи, чылай пысăк предприяти директорĕ.
– Юлташсене, эппин, кĕрсе курар-ха, – терĕмĕр.
Предприяти кантурĕнчи столовăйне уявла капăрлатнă. Мал енчен «Юбиляра саламлатпăр!» тени тÿрех курăнать. Кăнтăр вăхăтне кура сĕтелсене хаклă хăнасене кĕтнĕн хатĕрленĕ, сăпайлăх кучченеçĕпе пуянлатнă. Предприяти гендиректорĕн çумĕ Василий Алексеевич Попов çитсе кĕчĕ. Чи малтанах, паллах, Валентина Степановнăна саламларĕ. Мартăн 11-мĕшĕнче унăн çуралнă кунĕ тата çавра менелникĕ. Юбиляра телей те ăнăçу, ырлăх-сывлăх сунĕç, парнисене, наградисене, тав тунă хучĕсене асилтерĕç...
Унăн тава тивĕçлĕ ĕçĕ-хĕлĕ куç умĕнчех. Комплексри фермăсенче, аслă вунă витере, 2.104 ĕне выльăх тăрать. Сăваканнисем – 1.100 ĕне. Кашнийĕнчен кунне 15–16 килограмм сăваççĕ, талăкра пурĕ 16 тонна пухăнать. Вăл пĕтĕмпе тенĕпе пĕрех «Ядринмолоко» предприятие ăсанать. Харпăрхăй ĕçĕ-хĕлĕпе механизаторсем те, выльăх-чĕрлĕхе витесенче пăхакансем те кăмăллă. ,ç укçи вăтамран алла 16–17 пин тенкĕ тухать. Хăшпĕр тапхăрсенче, калăпăр, çуллахи вăхăтра, нумайрах та ĕçлесе илеççĕ. Столовăйĕнче кăнтăрлахи апата тÿлевсĕр тенĕпе пĕрех çитереççĕ, çулла – пачах тÿлевсĕр. Коллективра ытларах Малтикас Ялтăра, Шăхаль çыннисем тăрăшаççĕ. Валентина Степановна тĕп агронома В.Антонова, тĕп зоотехника В.Романована, тĕп ветврача А.Иванована ырласа-мухтаса калаçать. «Пĕтĕм кăтартусемпе хамăрăн тĕллевсен шайĕнче ĕлкĕрсе пыратпăр», – терĕ юбиляр.
В.СОРОКИН.
М.ВАСИЛЬЕВ.