11 марта 2015 г.
«Мураты» кооператив ĕçченĕсене хĕллехи уйăхсенче те çураки шăпи канăç памасть. Çурхи тырăсене акма 1800 центнер вăрлăх кирлĕ пулсан, ăна çителĕклĕ хатĕрленĕ. Пур йышши вăрлăх 100 проценчĕпех кондициллĕ.
Çăкаллă Явăшри уй-хир бригадирĕ Ираида Андреевна Прокопьева çуракине епле хатĕрленни çинчен ыррине нумай каларĕ:
– Машинăпа трактор паркне çулсерен çĕнĕ йышши техникăпа пуянлатса пыратпăр. Пĕлтĕр тыр-пул пухса кĕртмелли комбайн туянтăмăр. Темиçе çул каялла ял хуçалăх культурисене туса илнĕ çĕрте ытларах алă вăйĕпе усă курнă пулсан, халĕ йăлтах техника вăйĕ çине куçарса çитертĕмĕр. Çавăнпа гектар тухăçĕ районти ытти хуçалăхрисемпе танлаштарсан пирĕн пысăкрах, тăкаксем сахалтарах. Уй-хиртен илекен тупăша ÿстерес тесе кăçал та вăрлăх хатĕрлесси çине пысăк тимлĕх уйăртăмăр. Пур йышши вăрлăха кĕркуннех лайăх тасатса кĕлетсене хутăмăр. Çуракине хутшăнмалли пур йышши техника юсавлă. Халĕ минераллă удобренисемпе çунтармалли-сĕрмеллли материалсем кÿрсе килессипе ĕçлетпĕр. Пире, çĕр ĕçченĕсене, çураки шăпи ака-сухана тухичченех тимлĕхе ÿстерме хистет. Иртнĕ кунсенче тĕрĕслев ирттернĕ хыççăн çакă палăрчĕ: 302 гектар çинчи кĕрхи тырă калчисем лайăх хĕл каçаççĕ. Çĕр улми вăрлăхĕ те çителĕклĕ, вăл типтерлĕ упранать.
В.МОСКВИН.