11 марта 2015 г.
Калининăри шкул-интернатăн футбол команди тăрăшсах тренировкăсенче пиçĕхет. Апрелĕн 15–17-мĕшĕсенче вĕсен Саранскра иртекен Атăл тăрăхĕнчи федераллă округăн ăмăртăвне хутшăнмалла.
Ку тивĕçе 14–15-ри каччăсем турнирăн республикăри тапхăрĕнче çĕнсе илнĕ. Çĕрпÿ районĕнче ача çурчĕсемпе шкул-интернатсем хушшинче иртнĕскерте, тăван вĕрентÿ учреждени чысне Артем Путряшов, Эдуард Сергеев, Валерий Антонов, Рома Кассиров, Александр Егоров, Александр Сатушкин, Виктор Иванов, Михаил Иванов çĕнтерÿллĕ хÿтĕленĕ.
Лев Николаевич Ефимов вĕрентекен ертсе пыракан команда «ЮНИТЭКС» çар-патриотизм воспитанийĕн тата çар хĕсметне хатĕрлес енĕпе ĕçлекен центрĕ йĕркелекен тупăшăва виççĕмĕш çул хутшăнать ĕнтĕ. Пĕлтĕр те вĕсем республика чемпионĕсем пулнă, Самарăри турнирта Атăл тăрăхĕнче мала тухассишĕн кĕрешнĕ. Хăйсен ушкăнĕнче иккĕмĕш пулнă пулин те, финалта призлă вырăна лекеймен.
Калининăри шкул-интернатăн кĕçĕн команди те – Владислав Верховцев, Андрей Семенов, Максим Лисицин, Николай Иванов, Руслан Гордеев, Анатолий Краснов, Дмитрий Лисичкин тата Анастасия Спиридонова – тăрăшуллă вылянă. Çĕрпÿсемпе йĕпреçсем хыççăн виççĕмĕш вырăна тухнă. Ку ачасем Петр Яковлевич Петров патĕнче ăсталăха туптаççĕ.
– Пĕтĕм Раççейри ăмăртăвăн Атăлçи тапхăрне вăйлă командăсем хутшăнаççĕ пулин те парăнма шутламастпăр-ха. Ачасем вĕçне çити кĕрешес тĕллевлĕ, – пĕлтерчĕ Лев Николаевич.
С.ЧИКМЯКОВА.