07 марта 2015 г.
Çĕршывра хальхи вăхăтра влаç органĕсен ĕç-хĕлĕн уççăнлăхĕн информацийĕпе тивĕçтересси анлă пырать. Чăваш ен Пуçлăхĕ Михаил Игнатьев та хăйĕн иртнĕ çулхи Çырăвĕнче Интернетра халăхпа таврăнăçуллă çыхăну йĕркелес задачăна лартрĕ. Çавна май иртнĕ çул вĕçĕнче республикăри «Халăх контролĕ» портал (nk.cap.ru) ĕçлеме тытăнчĕ.
Портала йĕркелени икĕ еншĕн те усăллă: халăх унта хăйне мĕн пăшăрхантарнине пĕлтерме, влаç органĕсем вĕсем тăрăх мерăсем йышăнма пултараççĕ. Çак ĕç, чи малтанах, çынсемпе чиновниксен хушшинчи çыхăнăва ансатлатать, вĕсен ĕçĕн шанăçлăхне ÿстерет.
Кунашкал вăхăтлăх тытăмсем маларах та пулнă, анчах «Халăх контролĕ» портал темиçе хут çăмăлрах. Ăна хатĕрлекенсем унчченхи çитменлĕхсене йăлтах шута илнĕ. Ресурспа усă курма патшалăх тивĕçтерĕвĕсен пĕрлехи порталĕнче (gosuslugi.ru) регистрациленмелле кăна. Ыйтусене вырăсла та, чăвашла та çырма юрать.
Хальлĕхе вĕсене сакăр сферăпа – пурăнмалли çурт-йĕрпе коммуналлă хуçалăх, çыхăну, социаллă политика, бизнес, экологи, тирпей-илем тата хăтлăх кĕртесси, çулсем тата ял хуçалăхĕ – енĕпе йышăнаççĕ. Енчен те çынсем ыйтсан, списока тăсма та хирĕç мар.
Çакă та витĕмлĕ – порталта ыйтупа пĕрле сăнÿкерчĕк те вырнаçтарма, проблема вырăнне кăтартма май пур.
Республикăра пурăнакансем вăл е ку темăна ыйтса çырни тÿрремĕн отрасль министерствине е ведомствине кайни. Тĕп уйрăмлăхĕ вара: портал урлă янă ыйтусене 10 ĕç кунĕ таран пăхса тухаççĕ. Тепĕр чух хуравсем маларах та килеççĕ.
«Халăх контролĕ» портал ĕçлеме пуçланăранпа икĕ уйăх кăна иртрĕ-ха, анчах та çынсен активлăхĕ пысăк. Хальлĕхе унта 390 яхăн ыйтупа тухнă. Тĕпрен илсен, çынсем ытларах çул-йĕр япăх пахалăхлă, урамсенче çутă çителĕксĕр пулнишĕн, парковкăсем çуккишĕн е автомобильсене ăçта килнĕ унта лартса хăварнишĕн кăмăлсăрланаççĕ. Ыйтусем парассипе уйрăмах шупашкарсем, çĕнĕ-шупашкарсем, сĕнтĕрвăррисем хастар.
Вăрнар районĕпе илес пулсан, кунта пурăнакансенчен хальлĕхе пилĕк ыйту кăна пулнă: 4-шĕнче ял ячĕсем тĕрĕс маррине, пĕринче Пăртас ялĕнчи Советски урамра çутă çуккине кăтартнă. Пĕр ыйту тĕлĕшпе халĕ ĕçсем пыраççĕ, тăваттăшне хуравсем панă.
«Халăх контролĕн» усси-вăйĕ пысăк. Çавăнпа та Вăрнар тăрăхĕнче пурăнакансем хăйсене пăшăрхантаракан ыйтусене уççăнах пĕлтерме пултараççĕ.