04 марта 2015 г.
Виçĕмкун Чăваш ен Пуçлăхĕ Михаил Игнатьев республикăра пурăнакан 36 ветерана «Тăван çĕршывăн 1941–1945 çулсенчи Аслă вăрçинче Çĕнтерÿ тунăранпа 70 çул» юбилей медалĕсемпе чысланă.
М.Игнатьев Çĕнтерÿ кунĕ çынсен чĕринче уйрăм вырăн йышăннине палăртнă. «Ку чăннипех те ăрусене пĕрлештерекен çутă уяв. Пирĕн халăх, вĕттинчен пуçласа ватти таран, çĕршыв хÿтĕлевне тăрса пĕрлĕх, ирĕклĕх, хăюлăх тата Тăван çĕршыва юратни кирек мĕнле тăшмана та çĕнтерме пултарнине çирĕплетсе панă. Чăваш халăхĕ те Аслă Çĕнтерÿшĕн вăйне шеллемен. Çĕнтерÿçĕ-ăру паттăрлăхĕ çитĕнекен ăрушăн кăмăл-сипет, патриотизм ориентриĕ пулĕ», – тенĕ вăл.
Пирĕн районтан Аслă Çĕнтерĕвĕн юбилей медальне пĕрремĕшсен йышĕпе Павел Агилов тивĕçнĕ.
Павел Сергеевич – Чăваш Республикин культурăн тава тивĕçлĕ ĕçченĕ, Чăваш Республикин музыка обществин тава тивĕçлĕ деятелĕ. 40 çул районти культура сферинче тăрăшнă, районти культура çурчĕн, «Химик» клубăн директорĕ пулнă. Ăна «Тăван çĕршывăн Аслă вăрçи вăхăтĕнче ырми-канми ĕçленĕшĕн» медальпе наградăланă.
С.ЧИКМЯКОВА.