04 марта 2015 г.
Патшалăх тата муниципаллă тивĕçтерÿсене илесси ансатланчĕ. Ку ĕçре нумай функциллĕ центрсем (НФЦ) пысăк вырăн йышăнаççĕ, вĕсем черетсенчен, документсем пуçтарма пĕр учрежденирен теприне çÿрессинчен хăтараççĕ.
Паспорт тутармалла, мăшăрланăва регистрацилемелле, хваттер черетне тăмалла е планировкăна улăштармалла тата ытти – çаксене халĕ пĕтĕмпех НФЦ-ра илме пулать.
Вăрнар районĕнче халĕ «пĕр чÿрече» мелĕпе тăватă çын ĕçлет, кăçалтан йыш пиллĕке çитмелле.
Хальхи вăхăтра НФЦ-ра федераллă 45, республикăн 71 тата муниципаллă 46 тивĕçтерĕве илме май пур. Çынсем ытларах Росреестр, федераллă миграци службин, сывлăх сыхлавĕн министерствин тивĕçтерĕвĕсем пирки ыйтса çыраççĕ.
Пĕлтĕр тĕрлĕ ыйтупа центра 8978 çын килнĕ, кăçалхи январьте 1285 ыйтупа тухнă, 202 консультаци панă. Кунне специалистсем вăтамран 29,3 çынна йышăнаççĕ.
Ял поселнийĕсенче пурăнакансемшĕн тивĕçтерÿсем илесси çывăхланчĕ. Модельлĕ библиотекăсенче те халĕ регионти тата муниципаллă тивĕçтерÿсем тĕлĕшпе заявленисем çырма май пур: Çĕрпелте, Ершепуçĕнче, Вăрманкасра, Малти Ишекре, Хирпуçĕнче, Хапăсра, Кĕçĕн Кипекре, Калининăра, Чăрăш Ишекре, Ярмушкара, Пăртасра, Уйкас Кипекре тата Аçăмçырминче.
Нумай функциллĕ центрсен тĕллевĕ – халăха документсене вăхăта çухатмасăр, укçа-тенкĕ ытлашши тăкакламасăр илме майсем туса парасси. Аса илтерме, тÿлевлĕ тивĕçтерÿсем электронлă майпа йÿнĕрех те.