04 марта 2015 г.
«Победа» ял хуçалăх производство кооперативĕнче (ертÿçи Алевтина Петровна Семенова) ку тăруçăнхи хăш-пĕр йывăрлăхсене çирĕппĕн çĕнтерсе пырса ĕçлени чăнахах куçкĕрет. Ял çыннисене, тĕрĕссипе, нихăçан та çăмăл килмен. Калăпăр, выльăх-чĕрлĕх патĕнче кунĕн-çĕрĕн тăрмашма тивет.
Ку хуçалăхри ĕне выльăх фермин витисене февралĕн 25-мĕшĕнче кĕрсе куртăмăр. Район администрацийĕн ял хуçалăх управленийĕн пуçлăхĕн çумĕпе В.П.Никифоровпа, управленин тĕп зоотехникĕпе Г.П.Романовпа тата «Агроинвестăн» Вăрнарти консультаци пункчĕн директорĕпе Е.М. Алексеевпа пĕрле пултăмăр. Пĕрлехи кунашкал рейдсене çак тапхăрта малашне те ирттерме палăртнă.
Ĕне выльăх фермăра 400 пуç ытла тăрать. Уйрăмшар витесенче – сăваканнисем, вăкăрсем, пăрулама хатĕрленнисем. Пысăкрах кĕтĕве хĕрÿ хĕвел çине кăларнă. Галина Михайловна Плотникова пĕлтернĕ тăрăх, кунта ĕçлекенсене хуçасем тимлĕ пăхнăшăн дояркăсем кăмăллă. Вăл 50 ĕне сăвать, кункаçа кашнийĕнчен 12 – 13-шер килограмм илет. 135 ĕнерен 1600 литр пухăнать. Сĕт завочĕ литрне 20 тенкĕпе туянать.
Апат тулăх, çителĕклĕ теме юрать. Ăна минералсем хушса пуянлатмалли цех ахаль лармасть. Апат единиципе шутласан, выльăх пуçне 14-шар килограмран кая мар тивет. Çав шутра улăм 6 кило, утă – 3-4, сенаж – 15.
Хирпуçĕнче те, Рункăра та ĕне тытакансем йышлă. Пĕр ялта икĕ кĕтÿ. Киллĕ хăш-пĕр хуçалăх виçĕ-тăватă ĕне усрать. Икшер ĕне сăвакансем уйăхра 30 пин тенке яхăн тупăш кураççĕ. Пăрачкав енчен килсе туянакансем пĕр литршăн 17 тенкĕ тÿлесе хăвараççĕ. Çăмăл мар, паллах, утă пайтах пухмалла, касупа çÿреме те пĕлмелле. Анчах телее çичĕ ютра шыриччен тăван çĕр çинчех пурнăç туни пуриншĕн те усăллăрах.
М.ВАСИЛЬЕВ.